د مالیې وزارت مقام د شکایتونو اورېدو خپلواک آمریت ۱۵ شکایتونو ته رسېدنه کړې!
د مالیې وزارت د شکایتونو د اورېدو خپلواک آمریت د دغه وزارت اړوند ټولو شکایتونو؛ لکه: فساد، کم کاري، کار ځنډوني او د یو شمېر مسئولینو ناسم چلند ته د رسېدني مسئولیت په غاړه لري او ترلاسه سوي شکایتونه په مستقیم ډول د وزارت له مقام سره شریکوي.
دغه آمریت د روان (۱۴۰۳) هـ.ل کال لېندۍ میاشتي له پیل څخه د دغي میاشتي تر پایه پوري (۲۰) بېلابېل شکایتونه ترلاسه او اورېدلي دي، چي له دغه شمېر څخه (۱۵) شکایتونو ته رسېدنه سوې، (۲) تر کار لاندي دي او (۳) نور شکایتونه د کافي معلوماتو او شکایت کوونکو له لوري د اثباتیه اسنادو د نشتون له امله د دغي ادارې لخوا بې بنسټه بلل سوي.
په دغو شکایتونو کي (۱۵) د واټساپ له لاري او (۵) نور په حضوري بڼه له دې ادارې سره شریک سوي دي. په ترلاسه سويو شکایتونو کي ډېری د املاکو، تدارکاتو، مالي او منفکۍ په برخو کي دي، چي د دغه آمریت له لوري پر وخت رسېدنه ورته سوې ده.
د یادوني وړ ده، چي ټول هیوادوال کولای سي، چي د مالیې وزارت د بېلابېلو څانګو په ځانګړي توګه د عوایدي سرچینو او د ګومارني په برخه کي د اصلاحاتو په تړاو خپل شکایتونه، وړاندیزونه او نظریات د برېښنالیک، واټساپ، ټلیفون، حضوري بڼه او د شکایتونو د صندوق له لاري له دغې ادارې سره شریک کړي، چي د شکایتونو د آورېدو آمریت به له طبقه بندۍ وروسته په شفاف او ټاکلي وخت رسېدنه ورته کوي.
د اړیکو شمېرې: ۰۲۰۲۹۲۴۲۳۳/ ۰۲۰۲۹۲۴۱۹۰
واټساپ نمبر: ۰۷۴۵۷۶۵۷۵۶
برېښنالیک: Officialcomplaints@mof.gov.af
