د ابو نصر فراهي په ګمرک کي په لومړي ځل امنیتي کېمرې نصب او له مرکز سره ونښلول سوې!
د کب ۲۳مه ۱۴۰۳هـ.ل
د مالیې وزارت د ګمرکونو لوی ریاست له لوري د فراه ولایت د ابو نصر فراهي په ګمرک کي په لومړي ځل (۳۲) دانې امنیتي کېمرې نصب او له مرکز سره ونښلول سوې.
یادې امنیتي کېمرې، چي (۲) میلیونه افغانۍ لګښت پرې راغلی د ګمرکونو لوی ریاست د تخنیکي کارکوونکو له لوري نصب او فعاله سوې، چي د امنیتي مسایلو ترڅنګ د ګمرکي سر غړونو او د پېښو د مخنیوي په برخو کي به هم ترې ګټه واخیستله سي.
یادي کېمرې د فراه ولایت د ابو نصر فراهي ګمرک په بېلابېلو برخو کي نصب سوي دي، چي د یاد ګمرک ترڅنګ په مرکز کي د ګمرکونو لوی ریاست د کنټرول روم څانګي له لوري ئې هم څارنه او کنټرول کېږي.
د یادولو ده، چي د مالیې وزارت له لوري د نیمروز، ننګرهار، آقینې، هرات او کندهار ګمرکونه هم په امنیتي کېمرو پوښل سوي او له مرکز سره نښلول سوي دي، چي د روڼتیا او فساد د مخنیوي په موخه په دوامداره توګه د اړوندو ګمرکونو ګمرکي چاري څارل کېږي.
