د بیوزلۍ کمولو، د خدمتونو وړاندې کولو او ولسي مشارکت عالي شورا غونډه جوړه شوه
د بیوزلۍ کمولو، د خدمتونو وړاندې کولو او ولسي مشارکت عالي شورا غونډه د غبرګولي میاشتې په ۲۲مه نېټه د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، په مشرۍ د یادې شورا د غړو په ګډون په مالیې وزارت کې جوړه شوه.
په دې غونډه کې په راتلوونکو پنځو کلونو کې د هغو ګډوالو د بیرته راستنیدو لپاره د کډوالو او بیرته راستنیدونکو چارو وزارت په طرحې، له هغو مؤسسو سره په همغږۍ چې د ګډوالو د بیرته راستنیدو په برخه کې همکاري کوي، هغوی ته د ټولنیزو او حقوقي مصؤنیتونو په رامنځته کیدو، د نقدي مرستو په برابرولو، د بیوزلۍ په کمولو کې د غیر دولتي مؤسسو د رول په طرحې، کارموندنې، ګمارلو او یو شمېر نورو اړوندو مسایلو په اړه بحث او د نظرونو تبادله وشوه.
د یادونې وړ ده چې د بیوزلۍ کمولو، د خدمتونو وړاندې کولو او د ولسي مشارکت عالي شورا د جوړیدو موخه په هیواد کې د بیوزلۍ د عواملو معلومول او کمول دي تر څو حکومت وکولی شي د منظمو پروګارمونو له لارې په اساسي ډول له بیوزلۍ سره مبارزه وکړي.
