د ملي بودیجې د اجراء اصولنامې په تړاو د روزنیز پروګرام ګډونوالو ته تصدیق پاڼي ورکړل سوې!

د مالیې وزارت د ملي بودیجې لوی ریاست له لوري، د دغه ریاست کارکوونکو ته د روان (۱۴۰۳هـ.ل) کال ملي بودیجې د اجراء اصولنامې او اړوند چارو  په تړاو جوړ سوی یو میاشتنی روزنیز پروګرام پای ته ورسېد.
په دې تړاو ناسته کي د مالیې وزارت مالي معین حاجي عبدالقدیر احمد، د ملي بودیجې لوی رئیس حبیب الله حبیب سباوون، د یاد ریاست د پلان او ریفورم رئیس پوهنمل غلام عمر عبدالله، د ملي بودیجې اجرائیوي رئیس عبدالجبار وحدت او د یاد ریاست کارکوونکو ګډون کړی وو.
د مالیې وزارت مالی معین وویل، چي د ملي بودیجې لوی ریاست کړني په ملي کچه پر مالي او اقتصادي وضعیت او همدارنګه د بودیجوي واحدونو په مالي چارو باندي مستقیم اغېز لري؛ نو اړینه ده، چي د دغه ریاست کارکوونکي له مسلکي پوهي او ژمنتیا څخه پوره برخمن واوسي.
نوموړي د دغه ریاست له کارکوونکو څخه وغوښتل، چي له مسلکي، تخصصي او تخنیکي روزنیزو پروګرامونو څخه په ګټي اخیستني سره اړوندي چاري په ښه ډول مخته یوسي.
د ملي بودیجې لوی رئیس وویل، چي دغه ریاست په مسلکي او تخصصي توګه د ملي بودیجې د ترتیب، تطبیق او نظارت مهمي چاري ترسره کوي، چي پر همدې بنسټ ئې د اړوندو چارو د لا ښه پرمخ وړلو په موخه د دغه ریاست کارکوونکو ته یو میاشتنی روزنیز پروګرام جوړ او ترسره کړ.
ښاغلي سباوون زیاته کړه، چي په دغه پروګرام کي ګډونوالو ته د (۱۴۰۳هـ.ل) کال ملي بودیجې د اصولنامې، د بودیجې د تطبیق، څارني او همدارنګه په نړیوال معیار برابر د (GFS, PEFA, COFOG) پرګرامونو او د عادي او پراختیایي بودیجې د تخنیکي نورمونو؛ لکه: (ب 10 – ب 20 - ب 23 – ب 3) په تړاو د مجربو ټرینرانو له لوري ګټور معلومات ورکړل سول او په راتلونکي کي به هم د روزني ورته پروګرامونه دوام ولري.
په پاې کي د مالیې وزارت د مالي معین له لوري د ملي بودیجې لوی ریاست یو شمېر مسئولینو او د یاد ریاست د رئیسانو له لوري د روزنیز پروګرام ګډونوالو ته تصدیق پاڼي ورکړل سوې.