تعرفې کمېټې د روان مالي کال دوهمه ناسته جوړه سوه
د تعرفې کمېټې د (۱۴۰۲) مالي کال دوهمه ناسته د ګمرکونو او عوایدو معین ښاغلي ملا عبدالقاهر ادریس په مشرۍ د یاد معینیت د غونډو په تالار کي ترسره سوه.
په دې غونډه کي، چي د یادي کمېټې غړو هم ګډون کړی وو، په پیل کي د ګمرکونو او عوایدو معین ټولو ګډونوالو ته د ښه راغلاست تر څنګ د تعرفې کمېټې په ارزښت خبري وکړې.
د ګمرکونو لوی ریاست د تعرفې رئیس ښاغلي عبدالرحمن وقاد د پولي ایتلین له ډولونو څخه د پلاستیکي کڅوړو، د تورو نلونو او د جستي رویې اوسپنیزو نلونو او بطریو د وارداتي تعرفو په اړه د سوداګرو او صنعتکارانو غوښتني د غونډي له ګډونوالو سره شریکي کړې او د لا ښه وضاحت په موخه ئې د یادو اقلامو د اوسنۍ تعرفې، په افغانستان کي د یادو اقلامو د تولیدي فابریکو د ظرفیت او د دغو فابریکو له لوري د ورکړل سوو مالیاتو په اړه هر اړخیز معلومات وړاندي کړل.
د تعرفې کمېټې غړو د یادو اقلامو په تعرفې هر اړخیز بحث وکړ او له کورني تولید څخه د ملاتړ، د سوداګرۍ او دولتي عوایدو د ودي اصل ته په کتو سره ئې په اړه اړیني پرېکړي وکړې.
همدارنګه د سوداګرۍ په برخه کي د اسانتیاوو رامنځته کولو په موخه د یو شمېر اجناسو لپاره د تعرفې ملي کوډونو په جوړېدو هم پرېکړه وسوه.
د دې ترڅنګ په دې کمېټه کي د رومیانو، پیازو، کچالو، هندواڼو، خټکيو، او بادرنګو د موسمي جنترۍ وړاندیز سوي بدلونونه هم ومنل سول.
