کابل په ګمرک کي د یو کلي موټرو د ثبت او محصول پروسه چټکه سوې

د مالیې، کورنیو چارو، ترانسپورټ وزارتونو او د استخباراتو ادارې تر منځ د یو کلي (بي اسنادو) موټرو د ثبت او محصول پروسې د چټکوالي په موخه هوکړه لیک لاسلیک سوی، چي له دې سره د کابل ګمرک په ګډون په ټولو ګمرکونو کي د پخوا په پرتله یاده پروسه چټکه سوې ده.
اوس مهال د کابل په ګمرکونو کي هر ورځ د ۱۰۰ بې اسنادو موټرو تخنیکي او ګمرکي طی مراحل تر سره کیږي، چي د نورو بې اسنادو موټرو له ثبت سره به دا ظرفیت نور هم لوړ سي.
د ګمرکونو لوی ریاست د بي اسنادو موټرو له هغو مالکینو څخه چي تر اوسه یې خپل موټر نه وي ثبت کړي، غوښتنه کوي چي له دې فرصت څخه ګټه واخلي او ژر تر ژره خپل موټر ثبت او قانوني سندونه ورته واخلي.
د یادوني وړ ده، چي په یاده پروسه کي د بې اسنادو موټرو د محصول لپاره د افغانستان اسلامي امارت له لوري د پام وړ تخفیف په نظر کي نیول سوی او په پای ته رسېدو سره بیا د تمدید وړ نه ده.
د نورو معلوماتو لپاره کولای سئ د 221 شمېرې سره په اړیکه کي سئ.