د اسلامي پراختیا بانک څلورڅلوېښتمه کلنۍ ناسته وشوه
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، چې مراکش هیواد ته په رسمي سفر تللی وو د اسلامي پراختیا بانک ۴۴ مې کلنۍ ناسته کې ګډون وکړ. دغه ناسته پایداره پراختیایي موخو ته د رسېدو لپاره په نوې ستراتېژۍ کې د پام وړ بدلون راوستو لپاره جوړه شوې وه، چې د ۵۶ اسلامي هیوادونو مالیې وزیرانو او استازو، د شرکتونو او غیر دولتي مؤسسو استازو، پکي ګډون کړی وو.
د مالیې وزارت سرپرست په دې ناسته کې د ګډون ترڅنګ، د هیوادونو له لوړ پوړو چارواکو او مرسته کوونکو سازمانونو، د نړیوالو بانکونو له رئیسانو او د اسلامي پراختیا بانک له رئیس سره په جلا توګه وکتل.
په دې ناستو کې د مالیې وزارت سرپرست ټینګار وکړ، چې افغانستان اوس مهال د بدلون له لسیزې د تېرېدو په حال کې دی، چې ځان بسیاینې ته اړتیا لري. افغانستان ژر ځان بسیاینې په بسته کار کړی او اقتصادي ځان بسیاینې ته د رسېدو له پروسې سره د مرستې لپاره د ۸.۷ میلیارده امریکایي ډالرو په ارزښت د پانګونې بستې وړاندیز کوي.
د اسلامي پراختیا بانک رئیس ښاغلي ډاکټر بندرالحجار وویل: موږ باید د پراختیا او پرمختګ لپاره تل نوې او نوښتي لارې پیدا کړو. نوموړي، اقتصادي ځان بسیانې ته د رسېدو لپاره د افغانستان د پانګونې پلان د ترتیب مبارکي ورکړه، له افغانستان سره یې د دې بانک د مرستو د لېوالتیا اعلان وکړ او له ټولو هیوادونو څخه یې وغوښتل چې د افغانستان په سترو پروژو کې پانګونه وکړي.
د یادونې وړده، چې د اسلامي پراختیا بانک د ګروپي ناستو سره هم مهاله یو شمېر حاشیوي ناستې هم ترسره شوې، چې په دې ناستو کې د ساینس، ټکنالوژۍ، نوښتونو د اغېزمن تغییر او بدلون لپاره د منلو پیاوړتیا په برخو کې د افغانستان حکومت د پنځه کلن پلان په څلورو اصلي ستنو هر اړخیز بحث وشو.
