د اصنافو استازو ته د مالیاتي پروسې په تړاو د عامه پوهای سیمینار وړاندي سو!
د مالیې وزارت د عوایدو لوی ریاست د امیرالمؤمنین (حفظه الله) له نوي فرمان سره سم د اصنافو (دوکاندارانو او کسبګرو) د مالیاتي معافیت او تخفیفونو د غوره پلي کولو په موخه او په ټولیزه توګه د مالیاتي پروسې په تړاو سیمینار د یوې ناستي په ترڅ کي د ګمرکونو او عوایدو ملی اکاډمۍ د غونډو په تالار کي ترسره کړ.
په دې ناسته کي د عوايدو لوی رئيس مولوي حافظ شاه حسين حسيني، د عوايدو لوی رياست د حقوقي خدمتونو او پاليسۍ رئيس مولوي نداء محمد صديقي، د کسبګرو او دوکاندارانو د خوني لوی رئیس حاجي شېرین آغا سخي او د اصنافو استازو ګډون کړی وو.
د عوايدو لوی رئيس مولوي حافظ شاه حسين حسيني د دغه سيمينار په پرانیستي وينا کي وويل، چي خلکو ته د اسانتياوو رامنځته کول او د هغوی د ستونزو حلول د افغانستان اسلامي امارت تګلاره ده او تل ئې په دې برخه کي هڅه کړي ده. د مالیاتي جریمو معافیت او (0.3) سلني ته د اصنافو د مالیې راکمول ئې یوه غوره بېلګه ګڼلی سو. د عوايدو لوی رياست اصولو ته په کتو او د عالیقدر اميرالمؤمنين (حفظه الله) له فرمان سره سم خپل تطبیقات ترسره کړي او په دې برخه کي له تاسي څخه د همکارۍ غوښتونکی دئ.
د عوايدو لوی رياست د حقوقي خدمتونو او پاليسي رئيس مولوي نداء محمد صديقي وويل، چي د نننۍ غونډي موخه اصنافو ته د اسانتیا رامنځته کولو او په آسانه ډول د مالیاتو راټولو په تړاو د اميرالمؤمنين (حفظه الله) د فرمان پلي کول دي، چي د عامه پوهاي سمینار د اسلامي امارت د رهبرۍ د فرمان پلي کولو او د مالیاتي ادارو او اصنافو ترمنځ د افهام او تفهیم یوه غوره وسیله ده، دا ډول سیمینارونه د خلکو د پوهاوي او د مالیاتي اطاعت پذیرۍ په برخه کي مهم رول لوبوي.
د افغانستان د کسبګرو او دوکاندارانو خوني رئیس شېرین آغا سخي د اسلامي امارت له رهبرۍ او مسئولینو څخه خلکو ته د اسانتیا رامنځته کولو او د هغوی د وړاندیزونو د منظورۍ له امله مننه وکړه او د امیرالمؤمنین (حفظه الله) د فرمان د پلي کولو او د رڼو او پر وخت مالیاتو د ورکړي په برخه کي ئې بشپړ ډاډ ورکړ.
د يادوني وړ ده، چي په دغه يو ورځني سيمينار کي د یوه پرزنټېشن په ترڅ کي د اصنافو ټولو استازو ته که په حضوري یا آنلاین بڼه ئې برخه اخیستې وه، د مالياتو، د مالیاتو د ډولونو، د مالياتو د بهیر، طرزالعملونو، د مالياتي نورمونو، مالیاتي لایحو، اظهارنامو او د عوایدو لوی ریاست د موخو په تړاو معلومات وړاندي سول او د ګډونوالو پوښتني هم ځواب سوې.
