د افغانستان لپاره د انګلستان نړیوالې پراختیایې مرستو ادارې له رئیس سره د مالیې وزارت نوماند وزیر او سرپرست د پیژندنې خبرې

د مالیې وزارت نوماند وزیر او سرپرست ښاغلي عبدالهادي ارغندیوال نن د وري میاشتې په ۳۰ نېټه د افغانستان لپاره د انګلستان نړیوالې پراختیایې مرستو ادارې له رئیس ښاغلي هیو واکر، سره د ویډیو کنفرانس له لارې بحث او خبرې وکړې.
په دې خبرو کې، د افغانستان لپاره د انګلستان نړیوالې پراختیایې مرستو ادارې رئیس ښاغلي ارغندیوال ته د مالیې وزارت د تصدۍ سپارلو مبارکي ورکړه او زیاته یې کړه چې په دې ستونزمن وخت، د کرونا ویروس د خپریدو ګواښ او د روان کال په پای کې د افغانستان لپاره د پراختیایې کنفرانس جوړیدل یو لوی مسؤلیت دی او زه ډاډ لرم چې تاسو یې په سمه توګه مدیریت کولی شئ. نوموړي ژمنه وکړه چې هیواد یې د پخوا په شان د افغانستان له حکومت او مالیې وزارت سره همکاري کوي او په روان کې په دریو برخو؛ د کرونا له ویروس سره د مبارزې، د پوهنې په برخه کې همکارۍ او بشردوستانه مرستو برخو کې به خپلو مرستو ته دوام ورکړي.
د مالیې وزارت سرپرست په اوسنیو شرایطو کې د انګلستان هیواد په ځانګړی توګه د یاد هیواد د نړیوالې پراختیایې مرستو ادارې د مرستو له دوام څخه مننه وکړه او زیاته یې کړه چې د افغانستان حکومت د کرونا ویروس له خپریدو سره د مبارزې لپاره مشخص پروګرامونه تر لاس لاندې لري او غواړي چې د اړتیا وړ اقتصادي بستو له لارې له خلکو سره مرستې وکړي.
د مالیې وزارت سرپرست وویل چې یاد وزارت له نورو دولتي ادارو سره په همغږۍ کار کوي څو د ۲۰۲۰ کال پراختیایې کنفرانس لپاره چې ټاکل شوی ده په ژنو ښار کې جوړ شي اړینې لاسته راوړنې تر لاسه کړي. د افغانستان لپاره د انګلستان نړیوالې پراختیایې مرستو ادارې رئیس وویل چې نوموړی له نورو مرستو کوونکو سره په اړیکه کې ده او هیله مندي یې وښوده چې یاد کنفرانس به د افغانستان لپاره د پام وړ لاسته راوړنې ولري

په دې ناسته کې چې د مالیې وزارت د پالیسۍ مرستیالې اغلی ناهید سرابي هم شتون درلود ویې ویل چې د افغانستان کابینې له کرونا ویروس سره د مبارزې لپاره پروګرامونه منظور کړي دي. نوموړې زیاته کړه موږ په دې کار کو چې څه ډول کولی شو د افغانستان بیا رغونې وجهي صندوق (ARTF) له لارې د نړیوالې تولنې او د افغانستان د مرسته کوونکو مرستې تر لاسه کړو