د اقینې ګمرک د موټرونو تم ځای جوړ او ګټي اخیستني ته وسپارل سو!
د زمري ۷مه ۱۴۰۴هـ.ل
د مالیې وزارت د ګمرکونو لوی ریاست د فاریاب ولایت د اقینې ګمرک د موټرونو تم ځای د نږدې (۲۹) میلیونه افغانیو په ارزښت جوړ او ګټي اخیستني ته وسپاره.
د موټرونو دغه تم ځای، چي په (۵،۵) جریبه ځمکه کي جوړ سوی او په اساسي ډول پکښې کانګرېټ اچونه سوې ده، ترڅنګ ئې شنه ساحه، د اوبو اساسي ویالې او د برېښنا سیسټم هم لري.
د موټرونو دا تم ځای په یوه مهال د (۹۰) بار وړونکو موټرونو د درېدو ظرفیت لري، چي له دې وروسته به موټر چلوونکو، سوداګرو او د سوداګریزو توکو د تشرېح په برخه کي د ګمرک کارکوونکو ته ګڼي اسانتیاوي رامنځته سي.
د یادوني وړ ده، چي د دې پروژې لګښت د مالیې وزارت له پراختیایي بودیجې څخه ورکول سوی او چاري ئې هم د یوه افغاني شرکت له لوري په نږدې یوه کال کي بشپړي سوي دي.
