د بلخ ولایت د پنبې دانې او نباتي غوړیو شرکت خپل فعالیتونه بیا پیل کړل
د بلخ ولایت د پنبې دانې او نباتي غوړیو شرکت د غويي میاشتې په ۲۴ مه نېته پرانیستل شو او بیا یې خپلې کړنې پیل کړې.
په دې مراسمو کې د مالیې نوماند وزیر او سرپرست ښاغلي عبدالهادي ارغندیوال، د بلخ والي ښاغلي محمد اسحاق رهګذر، د کرنې اوبو لګونې او مالدارۍ وزارت مرستیال ښاغلي حشمت الله غفوري، د ازبیکستان جمهوریت سفیر ښاغلي یادګار خواجه شادمانوف، د خصوصي سکټور استازي ښاغلي جلال الدین سعید؛ او د اړوندو ادارو مسؤلینو او رئیسانو ګډون کړی وو.
په سرکې د بلخ والي ښاغلي محمد اسحاق رهګذر خبرې وکړې. نوموړي د مالیې وزارت له سرپرست اوجلالتمآب ولسمشر څخه مننه وکړه، چې له کورنیو صنایعو په ځانګړي توګه په ولایتونو کې د صنعت کارانو ملاتړ او زیاته پاملرنه ورته کوي. ښاغلي رهګذر زیاته کړه، چې د بلخ ولایت پنبې دانې او نباتي غوړیو شرکت یوه تاریخي فابریکه ده، چې فعالیت یې د تاریخي مثبت ذهنیت جوړولو ترڅنګ د کرنیزو تولیداتو د ودې او کارموندنې سبب ګرځي.
ښاغلي عبدالهادي ارغندیوال په دې مراسمو کې د دوست هیواد ازبیکستان جمهوریت له همکاریو د مننې ترڅنګ وویل:" د بلخ ولایت پنبې دانې او نباتي غوړیو د شرکت فعالیت پیل ځان بسیاینې او د کورنیو تولیداتو ودې ته د رسېدو لپاره د افغانستان د حکومت په ځانګړې توګه د مالیې وزارت د هڅو یوه برخه ده. یاد شرکت په ۲۴ ساعتونو کې د ۸ ټنه غوړیو تولیدولو وړتیا لري، په هغه صورت کې چې د بازار غوښتنه لوړه وي او په کافي اندازه خام مواد موجود وي، موږ کولی شو، چې د یاد شرکت د تولید وړتیا له ۱۰۰ تر ۱۵۰ ټنو پوري په ۲۴ ساعتونو کې لوړه کړو. ښاغلی ارغندیوال زیاته کړه، چې مالیه وزارت د ټولو دولتي تصدیو او شرکتونو د فعالولو لپاره پلان لري او ټاکل شوې ده، چې په نږدې راتلونکې کې د کندوز ولایت سپین زر شرکت په شپه او ورځ کې د ۱۰ ټنه نباتي غوړیو او د ګلبهار نساجي شرکت فابریکه په یوه کال کې د ۵۰۰ زره جوړو په ګنډلو سره په راتلونکي یوه کال کې په کار پیل وکړي.
د ازبیکستان جمهوریت سفیر ښاغلي یادګار خواجه شادمانوف وویل:" خوشحاله یم چې افغانستان نن د کورنیو تولیداتو د ملاتړ په برخه کې ستر ګام پورته کړ. نوموړي زیاته کړه، چې دې هیواد ته د جلالتماب محمد اشرف غني د سفر په مهال له هوکړې سره سم چې د دواړو هیوادونو ترمنځ لاسلیک شو د ازبکستان جمهوریت د دې شرکت د فعالولو په برخه کې تخنیکي همکارۍ ترسره شوې دي" ښاغلي شادمانوف وویل، چې د دې شرکت په پرانیستو او ګټې اخیستو سره لسګونه افغانانو ته د کار زمینه برابره شوې ده او له افغانستان سره د بنیادي تولیداتو د فعالولو لپاره مرسته کوي. نوموړي، د افغانستان او ازبکستان اړیکې تاریخي وبللې او له افغانستان سره یې د دې هیواد په همکاریو او مرستو ټینګار وکړ.
د کرنې اوبو لګونې او مالدارۍ وزارت مرستیال ښاغلي حشمت الله غفوري وویل، چې موږ د کورنیو کرنیزو تولیداتو ودې او زیاتېدو ته ژمن یو او خوشحاله یم چې له کرنیزو محصولات په یاد شرکت کې ګټه اخیستل کېږي.
