د دولتي شرکتونو د څار پلاوي ناسته وشوه
د مالیې نوماند او سرپرست وزیر ښاغلي عبدالهادي ارغندیوال، په مشرۍ د چنګاښ میاشتې په ۲۱ مه نېټه د دولتي شرکتونو د څار پلاوي ناسته په مالیه وزارت کې وشوه.
په دې ناسته کې چې د دولتي شرکتونو د څار پلاوي رئیس هم شتون درلود، په پیل کې د اریانا افغان هوایي شرکت عامل پلاوي د باختر هوایي شرکت بیا رامنځته کېدو د پرمختګونو او د دې شرکت لپاره د بودیجوي اړتیاوو په تړاو مفصل معلومات وړاندي کړل. دارنګه د اریانا افغان هوایي شرکت عامل پلاوي زیاته کړه، چې د کویډ ۱۹ خپرېدو له کبله د یاد شرکت د پروازونو لغوه کېدو یو لړ ستونزې رامنځته کړي دي او د یاد شرکت د مالي ستونزو د حلولو په موخه د دولتي شرکتونو د څآر پلاوي اړوندو ادارو ته لارښوونه کړې ده، څو د دې شرکت د مالي ستونزو حلولو لپاره تخنیکي ناسته وکړي او د حل لپاره یې مناسبه او بنسټیزه لاره د وروستیو پرېکړو لپاره د یاد پلاوي وروستۍ ناستې ته وړاندي کړي.
ورپسې د افغان پسټ عامل پلاوي، د افغان پسټ دولتي شرکت د پراختیا او عصري کولو طرحه ناستې ته وړاندي کړه او زیاته یې کړه، چې د پراختیایي طرحې په پلي کولو سره به هیوادوالو ته د کار چاره برابره شي او د یاد شرکت د عوایدو زیاتېدو سبب به وګرځي.
د دولتي شرکتونو د څار پلاوي د افغان پسټ دولتي شرکت د پراختیا او عصري کولو طرحه یوه اړینه اړتیا وبلله او کمېټه یې وګمارله څو د دې شرکت د پراختیا او عصري کولو طرحې شاملو شویو پروګرامونو لپاره د بودیجوي لومړیتوب او اړتیا په تړاو د دې شرکت له عامل پلاوي سره له نږدې کار وکړي او د پرېکړې لپاره دي خپل راپور د یاد پلاوي بلې ناستې ته وړاندي کړي.
په دې ناسته کې د انټرکانټینینټل هوټل عامل پلاوي، په ازاده سیمه کې د دې هوټل د رسټورانټ لپاره د فعالیت جواز اخیستو په اړه ناستې ته معلومات وړاندي کړل او زیاته یې کړه، چې دې هوټل د عامې روغتیا وزارت له لار ښوونو سره سم د کرونا ویروس خپرېدو د مخنیوي لپاره اړین ګامونه پورته کړي دي.
همدا شان د افغان ګاز او برېښنا او کود تصدۍ عامل پلاوي، ناستې ته د دې تصدیو د کړنو او ستونزو په اړه معلومات وړاندي کړل او د دولتي شرکتونو د څار پلاوي له لوري د دې دواړو تصدیو د ستونزو حلولو لپاره لازم تصمیمونه ونیول شول.
د ناستې په پای کې د انجینرۍ او انرژۍ مشورو او د افغانستان د اوبو خدمتونو (واپیکا) ریاست، له بودیجوي واحدونو دولتي شرکت ته د دې ریاست د حقوقي شخصیت د بدلون طرحې په اړه ناستې ته معلومات ورکړل. د دولتي شرکتونو د څار پلاوي د دې ریاست د حقوقي شخصیت د بدلون طرحې له اورېدو وروسته د دې شرکت په رامنځته کېدو د رایو په اکثریت پرېکړه وکړه.
