د دولتي شرکتونو مسئولینو ته د بازار موندني سیمینار ورکول سو
د مالیې وزارت د دولتي شرکتونو لوی ریاست د دغه وزارت په خیبرهال کي د دولتي شرکتونو د مسئولینو لپاره د بازار موندني سیمینار ترسره کړ.
لومړی د دولتي شرکتونو لوی ریاست د سوداګریزو چارو رئیس نوید احمد عازم، د دغه سیمینار په پرانیستې وینا کي وویل، اوس په ټول هيواد کي امنیت ټینګ سوی او د هيواد د اقتصادي پیاوړتیا لپاره باید هڅي وسي. څرنګه چي دولتي شرکتونه د اقتصاد اصلي شریانونه او بنسټیزي پایې ګڼل کېږي او د هغوی سیاستونه د اقتصاد په پام کي نیولو او تکیه کولو سره ترسیمېږي؛ نو پالیسي داسي باید تنظیم کړو، چي د تولیداتو عرضه زیاته سي او نه یوازي دا چي کورنۍ اړتیا پوره کړي؛ بلکي صادرات هم باید ولرو، ترڅو د دولت عواید زیات او په اقتصادي وده او سوکالۍ کي مهم رول ولوبوي.
وروسته بیا د دولتي شرکتونو د سوداګریزي برخي د پانګوني د جلب آمر عبدالاحد احدي د بازارموندني، د بازار موندني ستراتیژۍ، د بازارموندني د ډولونو، د بازار موندني د بېلابېلو ابعادو، د بازار جوړوني، د بازار سنجۍ، بازار دارۍ، بازار ګرمۍ، بازار ګرځېدني او نورو اړینو موضوعاتو په اړه پرزینټېشن وړاندي کړ او د ګډونوالو پوښتني ئې هم ځواب کړې.
په پای کي د یاد سیمینار ارزونه هم وسوه او ناسته د دعايې په ویلو سره پای ته ورسېده.
