د دوه اړخیزو اقتصادي همکاریو زیاتوالی د مالیې وزارت سرپرست او د ازبکستان د لومړي وزیر د خبرو اصلي محور وو
د ازبکستان جمهوریت پلاوي د یاد هیواد د بېلابیلو دولتي ادارو او ملي سوداګرو د استازو په ګډون د ازبکستان جمهوریت د لومړي وزیر ښاغلي عبدالله عارف اف، په مشرۍ نن د چنګاښ میاشتې په ۱۰ مه نېټه بلخ ولایت ته راغلل او د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي له لوري یې هر کلی وشو.
افغانستان ته د یاد پلاوي د سفر موخه د دواړو هیوادونو تر منځ شته پتانسیل ته په کتو سره د دوه اړخیزو اقتصادي او سوداګریزو اړیکو پراختیا او پیاوړتیا وه چې په هر اړخیز ډول د دواړو لوریو لخوا پرې خبرې وشوې.
د مالیې وزارت سرپرست ښاغلي پروفیسور محمد همایون قیومي او د ازبکستان جمهوریت لومړي وزیر ښاغلي عبدالله عارف اف، په لیدنه کې دواړو لوریو له حیرتان څخه تر مزار شریف پورې د ریل پټلې په پروژې، له ازبکستان هیواد څخه د برېښنا په واردولو، په افغانستان کې د برېښنا انرژۍ د بنسټونو په جوړیدو، د نساجي صنایعو په برخه کې د ازبکستان په همکاریو او پانګه ونې، د کیمیاوي کود د پیرلو، د پنبې صادرولو او په افغانستان کې د نمونه یې بڼ د جوړولو په ګډون د کرنې په برخه کې په همکاریو بحث او د نظرونو تبادله وکړه.
پریکړه وشوه چې د غونډې په یادو مواردو دې د دواړو خواوو تخنیکي ټیمونه کار وکړي او تر راتلوونکی غونډې چې ټاکل شوې ده په نږدې راتلوونکې کې د تاشکند په ښار کې جوړه شي یاد هوکړه لیکونه د لاسلیک لپاره چمتو کړي تر څو یې د عملي چارو لپاره ګام پورته وشي.
همداشان په دې ناسته کې دواړو لوري د دوه اړخیزو اقتصادي همکاریو د لا پیاوړي کولو او زیاتوالي غوښتونکي شول او یو ځل بیا یې په ګډو همکاریو ټینګار وکړ. .
