د رسنیو په تړاو د مالیې وزارت نوماند وزیر او سرپرست د تېرې ورځې د څرګندونو په اړه سپیناوی
د مالیې وزارت رهبري په هیواد کې د بیان ازادي او د رسنیو پراخ فعالیت د تېرو دوو لسیزو له سترو لاسته راوړنو څخه بولي او له دوی څخه ملاتړ کوي.
د هیواد رسنیو د حکومت د کړنو د انعکاس، د عامه ذهنیت روښانولو او د فساد له شومې پدیدې سره د اغیزمنې مبارزې په برخه کې رغنده رول لوبولی او تل یې په دې برخه خپل ملي رسالت تر سره کړی دی.
له بده مرغه په افغانستان کې ځینې اشخاص او کړۍ د هیواد د رسنیو له نوم څخه په ناوړه ګټه اخیستنه غواړي د امتیاز په بدل کې منفي تبلیغات وکړي او په دې ډول سره عامه ذهنیت خراب کړي، چې د مالیې وزارت نوماند وزیر او سرپرست ښاغلي عبدالهادي ارغندیوال په ولسې جرګه کې د تېرې ورځې د څرګندونو موخه هم د یادو کړیو یادونه وه، چې له بده مرغه د نوموړي له خبرو څخه غلط تعبیر اخیستل شوی.
د مالیې وزارت سرپرست په هیواد کې د رسنیو په رول ټینګار کوي، د حکومت او په ځانګړی توګه د مالیې وزارت د کړنو او فعالیتونو د انعکاس له کبله له دوی مننه کوي. د مالیې وزارت سرپرست له رسنیو څخه غوښتنه کوي چې د مالیې وزارت د کړنو په انعکاس کې له موږ سره خپله همکاري لا زیاته کړي.
