د روان مالي کال د ملي بودیجې د اجراء ورکشاپ ترسره سو
![خبر](/sites/default/files/2023-06/j2_0.jpg)
د مالیې وزیر الحاج ملا محمد ناصر اخند په مشرۍ او د ملي بودیجې لوی رئیس حبیب الله سباوون او د بودیجوي واحدونو د استازو په ګډون د (۱۴۰۲) مالي کال ملي بودیجې د اجراء روزنیز ورکشاپ د دې وزارت په خیبرهال کي ترسره سو.
د مالیې وزیر الحاج ملا محمد ناصر اخند ګډونوالو ته د ښه راغلاست تر څنګ وویل: د چارو د ښه پرمخ وړلو او ښو خدمتونو وړاندي کولو په موخه د مسؤلیت اړوند برخه کي پوهه حاصلول ضروري ده او په دې برخه کي باید هیح ډول غفلت ونه سي.
د مالیې وزیر، د بودیجوي واحدونو استازو ته په ټینګار سره وویل، چي د بودیجې ټول اصول په سمه توګه زده او رعایت کړئ، تر څو د بودیجې د اجراء اړوند ټولي چاري په اصولي ډول ترسره سي او په دې برخه کي د بودیجوي واحدونو او د وزارت اړوند برخو تر منځ هیڅ ډول خنډ او ځنډ رامنځته نسي.
د ملي بودیجې لوی رئیس وویل، چي د بودیجې د اجراء ورکشاپ مسلکي او تخصصي دئ؛ د دې لپاره چي په ځینو برخو کي یو لړ تغییرات او تعدیلات رامنځته کېږي، نو اړینه ده، چي د کړنلارو او لارښودونو د ښه وضاحت په موخه دغه شان روزنیز پروګرامونه په لاره واچوو، ښاغلي سباوون زیاته کړه، چي د بودیجې د اجراء په تطبیق کي که خدای مکړه له کومي ستونزي سره مخ سو، نو د ملي بودیجې لوی ریاست تخنیکي ټیم به په وخت مشکل حل او رسېدنه به ورته وکړي.
![خبر](/sites/default/files/inline-images/j1_2.jpg)
په پای کي د ملي بودیجې لوی ریاست تخنیکي ټیم د یو معلوماتي پرزینټیشن په وړاندي کولو سره د بودیجې د ډولونو، مراحلو، تخصیص، د حسابونو د جدول، د بودیجوي فورمونو، طرزالعملونو او د بودیجې د اجراء د لارښود په اړه ګډونوالو ته معلومات ورکړل او د هغوی پوښتونو ته ئې ځوابونه وویل.