د سیمه ایز اتصال عالي شورای دویمه تخنیکي ناسته وشوه
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، په مشرۍ د زمري میاشتې په ۱۴ مه نېټه د سیمه ایز اتصال عالي شورای دویمه تخنیکي ناسته د مالیې په وزارت کې ترسره شوه.
په دې ناسته کې د ښار دننه او بهر د ټرانسپورټي زېربنا په پرمختیا، د ټرانسپورټ وزارت سړکونو ملي ادارې له لارې د سیمه ایزې نښلونې په تحقق، د سیمې او نړۍ هیوادونو ته د افغانستان هوایي نښلونې په زیاتېدو، د (PRISEC) کمېټې د کړنو راپور او د کسب او کار په شاخصونو کې د افغانستان موقعیت ښه کېدو لپاره په ګام پورته کولو، د خصوصي سکټور د پرمختیا لپاره د ملي لومړیتوب لرونکو پروګرامونو او قوانینو او اصلاحاتو چې د پرایسیک په کمېټه کې کار پرې وشوی وو، هر اړخیزې خبرې او د نظرونو تبادله وشوه او همدا شان اړینې لارښوونې وشوې.
د یادونې وړده، چې د بهرنیو چارو، ټولګټو، اقتصاد، ټرانسپورټ، مخابراتو او معلوماتي ټکنالوژۍ او مالیې وزارتونه او د ملکي هوایي چلند اداره د اتصال عالي شورای غړي دي.
