د ماليې وزیر د بلخ ولایت له والي سره وکتل!
د مالیې وزیر الحاج ملا محمد ناصر اخوند بلخ ولایت ته د خپل رسمي سفر په ترڅ کي، ددې ولایت له والي حاجي محمد یوسف وفا سره وکتل
په دې کتنه کي، چي د بلخ ولایت مستوفي او یو شمېر نورو مسؤلینو هم حضور درلود، د ماليې وزیر د بلخ له والي څخه مننه وکړه، چي د مستوفیتونو له مسؤلینو سره ښه همغږي لري او د عوایدو د راټولولو په برخه کي پوره همکاري کوي.
په دې کتنه کي همدا راز، په بلخ ولایت کي د مالیاتو د را ټولولو پر بهیر، د حیرتان ګمرک پر وضعیت، د مستوفیت او ولایتي ادارو پر لا ښې همغږۍ، په بلخ ولایت کي د لګښتونو د کنټرول په موخه د جوړي سوي کمېټې پر اهمیت او اړوند نورو مسائلو خبري وسوې او د بلخ والي ډاډ څرګند کړ، چي په دغه ولایت کي د مالیاتو راټولولو په پروسه کي به د اړوند مالیاتي ادارو سره لازمي همکاري ته دوام ورکوي؛ ترڅو مالیات پر وخت او شفاف ډول راټول او ملي خزانې ته وسپارل سي.
