د مالیې وزارت سرپرست: افغانستان د اسیا پراختیایې صندوق (ADF) په ناستو کې به د لومړیتوب لرونکو مهمو پروژو تمویل وړاندی کړي
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د تلې میاشتې په ۲۰ مه نېټه د افغانستان لپاره د اسیایي پراختیا بانک له رئیس ښاغلي نرندرا سنګرو، سره په مالیې وزارت کې ولیدل.
په دې لیدنه کې دواړو لوریو د اسیا پراختیایې صندوق په ناستو، چې ټاکل شوې ده په نږدې راتلونکي کې د فلیپین په پلازمېنه مانیلا کې ترسره شي، د دې مجلسونو د څنډو په ناستو او نورو مهمو موضوعاتو په تړاو خبرې وکړې.
د مالیې وزارت سرپرست وویل، چې افغانستان به د اسیا پراختیایې صندوق او د څنډو په ناستو کې د دې بانک له مشرانو سره د اوبو د مدیریت سرچینې، کرنې، کارموندنې، بېوزلۍ کمولو، د کرنیزو تولیداتو ځنځیري ارزښت، د طبیعي سرچینو زېربنا، راتلونکي کې له اداري فساد سره د مبارزې پلان او اقداماتو، اقتصادي ودې، د حیواني محصولاتو په صادرولو او یو شمېر نور موضوعات روښانه کړي.
د اسیایي پراختیا بانک رئیس وویل، چې افغانستان د لویو پراختیایې پروژو د تمویل لپاره پور اخیستنې ته اړتیا لري او د پور اخیستنې اعتبار لوړولو لپاره اړینه ده چې باید د ملي عوایدو د ودې لپاره چې د پایداره اقتصادي ودې سبب ګرځي، هر اړخیزه ستراتېژي ترتیب کړي. د افغانستان لپاره د اسیایي پراختیا بانک رئیس، په یادو برخو کې د تخنیکي همکاریو لپاره ډاډ او چمتووالی وښود. نوموړي زیاته کړه، چې باید له افغانستان سره مرستې د دې هیواد د ملي بودیجې له لارې وشي چې دا کار د افغانستان ادارو د پیاوړتیا سبب کیږي.
همداشان دواړو لوریو د ( کریک) په نامه د مرکزي اسیا د سیمه ایزو اقتصادي همکاریو سازمان هیوادونو ناستې چې د افغانستان په کوربه توب به په کابل کې تر سره شي، د تر سره شویو اقداماتو په اړه بحث وکړ.
په پای کې د مالیې وزارت سرپرست، د اسیایي پراختیا بانک له مرستو مننه وکړه، او ویې ویل، چې د نوموړي بانک مرستې هغه ډله مرستې دي چې د خلکو لومړیتوبونو په پام کې نیولو سره د ملي بودیجې له لارې لګول کېږي.
