د مالیې وزارت سرپرست د اسیا بنسټیزې پانګونې بانک په څلورمه کلنۍ ناسته کې د افغانستان د اقتصادي ځان بسیاینې ستراتېژي وړاندي کړه
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د اسیا بنسټیزې پانګونې بانک په څلورمه کلنۍ ناسته کې د ګډون په موخه لوګزامبورګ ته سفر وکړ، د نوموړي بانک څلورمه ناسته د دوو ورځو لپاره د چنګاښ میاشتې له (۲۱- ۲۲) نېټې پوري په لوګزامبورګ ښار کې ترسره شوه.
په دې ناستو کې به د اسیا او اروپا د نښلونې په شمول، د اقتصادي او ټولنیزو همکاریو په نښلونه چې د هیوادونو د ډېرې همغږۍ له لارې تحقق پیدا کوي، بحث او د نظرونو تبادله وشي.
د مالیې وزارت سرپرست به په دې ناستو کې په افغانستان کې د عظیمې پانګونې د ظرفیت په هکله خبرې وکړي، همدا شان ټاکل شوې ده، چې نوموړی د اسیا بنسټیزې پانګونې بانک له رئیس ښاغلي جین لیقون، سره هم وګوري. ښاغلی قیومي، به په دې لیدنه کې د سترو ملي پروژو د پلي کېدو په تړاو د بحث کولو ترڅنګ، اقتصادي ځان بسیاینې ته د رسېدو په موخه د افغانستان د پانګونې بسته هم وړاندي او روښانه کړي.
په دې سربېره ټاکل شوې ده، چې د مالیې وزارت سرپرست، د افغانستان حکومت د پانګونې بستې ته د تحقق ورکولو لپاره د مالي همکاریو او پانګونې جذب په موخه د یو شمېر هیوادونو له چارواکو سره د ناستو په څنډو کې وګوري.
د یادونې وړ ده، چې د اسیا بنسټیزې پانګونې بانک، سترې بنسټیزې پروژې لکه، لمریزه انرژي او د( افغانستان، تاجیکستان، قرغیزستان، ایران او چین) رېل کرښه هم تمویلوي.
