د مالیې وزارت سرپرست د ننګرهار له والي سره په تورخم بندر کې په شته ستونزو او حل لارو خبرې وکړې
د مالیې وزارت سرپرست ښاغلي محمد خالد پاینده نن د کب میاشتې په ۷ مه نېټه د ننګرهار له والي ښاغلي ضیاالحق امرخیل سره په خپل کاري دفتر کې وکتل.
په دې کتنه کې چې د ماليې وزارت د عوایدو او ګمرکونو معین ښاغلي مجیب الرحمن شیرزاد هم شتون درلود، په پیل کې د ننګرهار والي په تورخم کې د ملي سوداګرو شته ستونزې د مالیې وزارت له سرپرست سره شریکې کړې او د حل لپاره د همکارۍ غوښتنه وکړه. همداشان دواړو لوریو په تورخم بندر کې د دوه کیلو مترو سړک او د دویم پله د جوړیدو چارو په چټکوالي، په دې سېمه کې د باروړنکو موټرو لپاره د پارکینګ په پراخوالي، په تورخم ګمرک کې د دویمې ډیجیټلي تلې په فعالولو او یو شمېر نورو اړوندو مسایلو په تړاو بحث او د نظرونو تبادله وکړه.
د مالیې وزارت سرپرست وویل چې په ګمرکونو کې ملي سوداګرو ته د اسانتیاو برابرول د مالیې وزارت له لومړیتوبونو څخه دي او د یادو ستونزو د حل لپاره به مالي امکاناتو ته په کتو سره ژر تر ژره رسیدنه وشي.
