د مالیې وزارت سرپرست د کریک ناستو په څنډه کې د ګرجستان د اقتصاد او پایداره پراختیا وزارت له مرستیاال سره ولیدل
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د لړم میاشتې په ۲۲ مه نېټه د منځنۍ اسیا د اقتصادي همکاریو سازمان (کریک) په ناستو کې د ګډون په موخه ازبکستان ته سفر وکړ.
د دې ناستې په څنډو کې د مالیې وزارت سرپرست، د ګرجستان د اقتصاد او پایداره پراختیا وزارت له مرستیال ښاغلي اکاکي ساغیراشویلي، سره د دوه اړخیزه اړیکو ټینګېدو او پراخېدو، د اقتصادي او سوداګریزو مناسباتو په پراخېدو کې د دوه اړخیزه اقتصادی او سوداګریز کمېسیون په رول، د لاجوردو سوداګرېز کرېدور له لارې اروپا او تورې بحیرې ته د افغانستان په لاسرسي، د سوداګریزې ودې لپاره د اړوندو کړنلارو ساده کولو په موخه په ګمرکي همکاریو، د سرحدي ګمرکونو د عصري کېدو په برخه کې د ګرجستان په تخنیکي همکاریو، د افغانستان د محصلینو لپاره د تحصیلي بورسیو په برابرولو او یو شمېر نورو اړوندو مسایلو په تړاو خبرې او د نظر څرګندونې وشوې.
د مالیې وزارت سرپرست، وویل، چې افغانستان غواړي د لاجوردو له ترانزیټي لارې او هوایي مسیر خپل سوداګریز توکې اروپا ته واستوي.
د ګرجستان د اقتصاد او پایدارې پراختیا وزارت مرستیال، له افغانستان سره یې د خپل هیواد د چمتووالي ترڅنګ وویل، چې د لاجوردو لارې د ګټې اخیستنې په موخه اړینه ده، هغه هیوادونه چې په دې لاره پراته دي خبرې او سلاوې وشي.
