د مالیې وزارت سرپرست له یو شمېر وزیرانو، د خپلواکو ادارو له مسؤلینو او بودیجوي واحدونو له استازو سره وکتل
د مالیې وزارت سرپرست او زېربنا په چارو کې د ولسمشرۍ عالي مقام ستر سلاکار ښاغلي ډاکټر محمد همایون قیومی، نن د سلواغې میاشتې په ۱۳ مه نېټه له یو شمېر وزیرانو، د خپلواکو ادارو له مسؤلینو او بودیجوي واحدونو له استازو سره د مالیې وزارت په خیبر هال کې وکتل.
په دې لیدنه کې له ملي بودیجې څخه بهر د پروژو او پروګرامونو په عملي کولو کې د ملګرو ملتونو سازمان مؤسسو د مرور او بررسۍ په رول او د ملګرو ملتونو سازمان مؤسسو او حکومتي ادارو ترمنځ د لا زیاتې همغږۍ او انسجام په اړه د اړوندو وزارتونو د وړتیا په رول ټینګار وشو.
د یادونې وړ ده، چې له ملي بودیجې څخه بهر د پروګرامونو او پروژو عملي کولو په تړاو د مالیې وزارت ناستې له اړوندو ادارو سره نن ورځ پیل شوې او ټاکل شوې چې په سکټوري توګه له نورو دولتي ادارو سره هم دوام پیدا کړي.
