د مالیې وزارت سرپرست په کابل کې د مصر عربي جمهوریت له سفیر سره په شمېر اقتصادي مسایلو خبرې وکړې
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د وږې میاشتې په ۹ مه نېټه د مصر عربي جمهوریت له سفیر ښاغلي هاني صالح مصطفی احمد، سره په مالیې وزارت کې وکتل.
په دې کتنه کې د مالیې وزارت سرپرست، سعودي عربستان ته د سفر له لاسته راوړنو یادونه وکړه او د دوه اړخیزه ژورو اړیکو د پراخېدو په موخه یې د صنعت او سوداګرۍ وزیر تر مشرۍ لاندي افغانستان ته د دې هیواد د لوړپوړي پلاوي له سفره خبر ورکړ.
په کابل کې د مصر سفیر، د مالیې وزارت ته وویل، چې هیواد یې د کورجوړونې او شنو خونو پروژې په ډېر ټیټ لګښت بریالۍ ترسره کړي دي، چې افغانستان هم کولی شي د کورجوړونې او شنو خونو د پروژو پلي کولو په برخه کې د مصر له تجربو ګټه واخلي.
همدا شان د مصر سفیر د مالیې وزارت سرپرست ته بلنه ورکړه، چې دې هیواد ته سفر وکړي او د کور جوړونې، شنو خونو او معلوماتي ټکنالوژۍ ښار ګوټې پروژې له نږدې وګوري، څو افغانستان وکولی شي د دې پروژو د پلي کولو څرنګوالې په برخه کې د مصر له همکاریو په ښه توګه برخمن شي.
د مالیې وزارت سرپرست، په کابل کې د مصر عربي جمهوریت له سفیر څخه د مننې ترڅنګ، د دوه اړخیزه مناسباتو په پراختیا او ټینګښت ټینګار وکړ.
