د مالیې وزارت مالي مرستیال د مرکزي اسیا او منځني ختیځ لپاره د پیسو نړیوال صندوق له رئیس سره ولیدل
د مالیې وزارت مالي مرستیال عبدالحبیب ځدراڼ، د نړیوال بانک او پیسو نړیوال صندوق د پسرلنیو ناستو په حاشیه کې د مرکزي اسیا او منځني ختیځ لپاره د پیسو نړیوال صندوق له رئیس جهاد ازور، سره چې د افغانستان بانک رئیس اجمل احمدي هم شتون درلود، د ویډیو کنفرانس له لارې لیدنه او خبرې وکړې.
په دې ناسته کې د مالیې وزارت مالي مرستیال، په ۲۰۲۰ کال کې د افغانستان په اقتصاد باندي د کرونا ویروس منفي تاثیراتو، له کرونا ویروس سره د مبارزې په برخه کې د افغانستان حکومت پروګرامونو او د افغانستان په اقتصادي وضعیت باندي د دې ناروغۍ منفي اغېزو په تړاو خبرې وکړې. نوموړي زیاته کړه چې د افغانستان د حکومت د مالي چارو ښه مدیریت په پایله کې د دې هیواد اقتصادي وده د مالي کال په پای کې منفي دوه ته را ښکته شوه، چې له دې وړاندي د نړیوال بانک او پیسو نړیوال صندوق له لوري منفي ۵ وړاندوېینه شوې وه.
همدا شان د مالیې وزارت مالي مرستیال په روان کال کې د افغانستان د ۶۰٪ وګړو د کرونا ضد واکسینولو په تړاو هر اړخیز معلومات وړاندي کړل او په ورته مهال یې په عامه سکټور کې د دولت د لګښتونو په تړاو د حکومت د اصلاحي پروګرامونو، پراختیایي پروګرامونو او پروژو تمویل، ملي عوایدو راټولېدو او له فساد سره د مبارزې په اړه خبرې وکړې، چې په دې برخه کې د افغانستان له بانک سره د مالیې وزارت د مالي سیستمونو وصلولو، په لګښتونو او ملي عوایدو راټولېدو او په دې سیستمونو کې د عصري ټکنالوژۍ او نړیوالو تجربو څخه د ګټې اخیستنې یادونه هم وکړه.
د مرکزي اسیا او منځني ختیځ لپاره د پیسو نړیوال صندوق رئیس د افغانستان د اصلاحي پروګرامونو هر کلی وکړ او په دې برخه کې یې د خپلو تخنیکي او مالي همکاریو ډاډ ورکړ.
