د مالیې وزارت یوه ۱۳ کسیز پلاوي د مالي چارو د هر اړخیزي ارزوني په موخه یو شمېر ولایتونو ته سفر وکړ
د خزاینو لوی ریاست یوه (۱۳) کسیز تخنیکي پلاوي، چي مشري ئې د افغانستان د مالي مدیریت معلوماتي سیسټم (افمیس) رئیس ستارالدین معتصم او د محاسباتو رئیس محب الله صاحبزاده کوله، د خپلو ولایتي سفرونو په لړ کي دا ځل کندهار، زابل او روزګان ولایتونو د مستوفیتونو د مالي آمریتونو او د ادارو د مالي چارو څخه له نږدې کتني او ارزوني، د کارکوونکو د روزني، د بې ځایه لګښتونو د کنټرول او بيروکراسۍ ختمولو، د مستوفیتونو او ولایتي ادارو ترمنځ د همغږۍ پیاوړي کولو، په اداري چارو کي د روڼتیا رامنځته کولو، د اوږدو پروسو لنډولو، دقیق او پر وخت د حساب ورکولو، د نوي نقدي او جنسي محاسبې د تعلیماتنامې اړوند نظریاتو راټولولو او نورو اړینو مواردو په موخه یادو ولایتونو ته سفر وکړ.
د هغو ناستو په لړ کي، چي په یادو ولایتونو کي ترسره سوې، لومړی د يادو ولايتونو مستوفيانو په ترتیب سره مولوي عبدالرب حنیف نصری، الحاج ملا حکمت الله اخوند او مولوي عتیق الله خالد راغلي پلاوي ته د ښه راغلاست ترڅنګ وویل، چي موږ له ډېري مودې راهیسي د داسي تخنیکي او مسلکي پلاوي په تمه وو، ترڅو د دوی له لاري وکولای سو د مستوفیت هغه برخي، چي ستونزي لري حل او اصلاح کړو.
وروسته د یاد پلاوي رئیسانو د مستوفیت د مالي آمریتونو کارکوونکو ته هدایت ورکړ، چي یاد فرصتونه دي غنیمت وشمېري او په مالي او حسابي برخه کي له دغه تخنیکي، مسلکي او عملي پرزينټېشنونو او لارښودونو څخه، چي د پلاوي له لوري وړاندي کېږي اعظمي ګټه پورته کړي او د شرعي قوانینو او مقرراتو په رڼا کي په لګښتونو کي د سپما او له بیت مال څخه د ساتني په برخه کي د مالیې وزارت متحد المالونو او هدایاتو باندي جدي اقدامات وکړي.
له هغه وروسته د یادو ولایتونو د مستوفیتونو د محاسبې لویو مدیرانو د مالي چارو د ټولو روانو پروسو په اړه پریزينټېشن وړاندي کړ، چي نیمګړتیاوي او ستونزي ئې د پلاوي له خوا په ګوته سوې. ورپسې د یاد پلاوي د هري څانګي مسئول د خپلو کارونو په اړه پریزينټېشن وړاندي او د ګډونوالو پوښتنو ته ئې ځوابونه ورکړل. د مالیې وزارت تخنیکي کارکوونکو د مستوفیتونو مالي آمریت اړوند ټولو څانګو څخه بیاکتنه وکړه او په هره برخه کي ئې د کار په جریان کي هغوی ته روزنه ورکړه او هغه ستونزي او نیمګړتیاوي ئې له نږدې څخه حل کړې، چي مالي آمریت ورسره مخ وو. همدارنګه د هیواد په کچه لویي ننګوني او ستونزي ئې هم له ځان سره یادداښت کړې، ترڅو د اطلاع رسوني او اړینو پرېکړو په موخه ئې مرکز سره شریکي کړي.
همدارنګه د محاسباتو رئیس یو پرزينټېشن، چي محتوا ئې د مالیې وزارت او د خزاینو لوی ریاست عمده دندي او مسئولیتونه، په ولایتونو کي د مستوفیتونو ارزښت او موقف، په (۱۴۰۱ل) کال کي د ولایتونو لګښتونه او عواید او ضروري او غیر ضروري لګښتونو ول، ګډونوالو ته وړاندي کړ. وروسته د ادارو د رئیسانو پوښتنو ته د قناعت وړ ځوابونه ورکړل سول او ورته و ئې وویل، چي د دوی غوښتني به د اجراآتو په موخه له چارواکو سره شریکي سي.
د دولتي ادارو له رئیسانو سره له ګډو ناستو وروسته د ذکر سوو موخو د پلي کولو او د هغوی د ستونزو اورېدو په موخه د مالي او اداري آمرینو سره هم ناستي ترسره سوې، چي په دې برخه کي ګڼ شمېر پوښتني د ګډونوالو له لوري مطرح سوې، چي د یاد پلاوي له خوا قانع کوونکي ځوابونه او اړیني سپارښتني ورته وړاندي سوې او په پای کي دغه ناستي د دعایې په ویلو سره پای ته ورسېدې.
