د مالیې وزیر پکتیا ولایت ته سفر وکړ
د مالیې وزارت سرپرست الحاج ملا هدایت الله بدري، تېره ورځ پکتیا ولایت ته سفر وکړ او هلته یې د دې ولایت له ګمرک څخه لیدنه وکړه.
د مالیې وزارت سرپرست د دې ولایت له ګمرک او ډنډپټان ولسوالۍ کي له صفري نقطې څخه لیدنه وکړه او هلته یې د ارکان رئيس مولوي حزب الله او ځینو نورو سیمه اییزو مسؤلینو، نظامي او غیر نظامي چارواکو سره د ګمرک د پراختیا، د ګمرک د محوطې دېوال جوړولو، د موټرونو د تم ځای د پراخه کولو او سوداګرو ته د اسانتیاوو برابرولو په تړاو خبري وکړې.
د لیدني په بهیر کي د مالیې وزیر د ګمرک له مسؤلینواو کارکوونکو او نورو دولتي چارواکو سره ولیدل د هغوی ستونزي او وړاندیزونه یې واورېدل او ژمنه یې وکړه، چي د ګمرک ستونزو ته به ژر رسېدنه کوي او مسؤلینو ته یې سپارښتنه وکړه، چي د ګمرک د محوطې دېوال جوړ، د موټرونو تم ځای پراخه، د ګمرک د پراختیا کارونه ژر تر ژره شروع، له سوداګرو سره مرسته وکړي او لازمي اسانتیاوي ورته رامنځته کړي.
د یادوني وړ ده چي د مالیې وزیر د یوه کال په موده کي د هیواد له یو شمېر ګمرکونو او مستوفیتونو څخه له نږدې لیدنه کړې او مسؤلینو ته یې لازمي لارښووني او سپارښتني کړي دي او د هغوی ستونزي يې اورېدلي.
