د مالیې وزارت کارکوونکو ته د اوبو او انرژۍ د سپما په تړاو سیمینار وړاندي سو
د سلواغې۱۵مه۱۴۰۴هـ.ل
د مالیې وزارت کارکوونکو ته د اوبو او انرژۍ وزارت د استازو له لوري په امارتي ادارو او کورونو کي د اوبو او برېښنا د بې ځایه لګښت د مخنیوي او مناسبي ګټي اخیستني په موخه سیمینار وړاندي سو.
په دې سیمینار کي د مالیې وزارت د دعوت او ارشاد رئیس مولوي عبدالهادي سیف الخالد، د وزارت امام او مبلغ مولوي وصیف احمد احمدي، د اوبو او انرژۍ وزارت استازي انجنیر اسماءالله مجیدي او ورسره همکارانو او د مالیې وزارت ګڼ شمېر کارکوونکو ګډون کړی وو.
مولوي وصیف احمد احمدي د پروګرام د پیل په وینا کي د شریعت له نظره په امارتي ادارو او کورونو کي د اوبو او انرژۍ د بې ځایه لګښت د مخنیوي او هیواد ته په دې برخه کي د ګټي رسولو په تړاو خبري وکړې. نوموړي، په کارکوونکو ټینګار وکړ، چي په خپلو دفترونو کي د اوبو او برېښنا د بې ځایه لګښت مخه ونیسي او په سپمېدو سره ئې په راتلونکي کي د پردیو له تکیې ځان خلاص کړي.
ورپسې د اوبو او انرژۍ وزارت د استازو له لوري په دې تړاو پریزینټېشن وړاندي سو او د اوبو او انرژۍ د بې ځایه لګښت په مخنیوي او سپما اوږدې خبري وسوې.
په پای کي د ګډونوالو نظرونه او وړاندیزونه ورسره شریک سول.
