د مستوفیتونو د راپور ورکولو، حواله جاتو او دفتردارۍ مدیرانو ته انلاین روزنیز پروګرام ترسره سو
د هيواد د (۳۴) ولایتونو مستوفیتونو د راپور ورکولو، حواله جاتو او دفتردارۍ مدیرانو لپاره انلاین روزنیز پروګرام د خزاینو لوی رئیس، نصرت الله محمود او د دغه وزارت د یو شمېر کارکوونکو په ګډون د خزاینو لوی ریاست کنفرانس خونه کي ترسره سو.
په دغه روزنیز پروګرام کي، چي د بشري سرچینو ریاست له خوا د خزاینو لوی ریاست په همکارۍ په لاره اچول سوی و، د خزاینو لوی رئیس نصرت الله محمود وویل: موږ په داسې یو وخت کي ژوند کوو چي ډېري فتنې شتون لري، اسلامي حکومت نوی پر پښو درېدلی او له ډېرو اقتصادي محدودیتونه سره مخ یو، له همدې امله زموږ مسؤلیتونه خورا زیاد دي او موږ باید خپلې دندي په پوره ژمنتیا او اخلاص ترسره کړو. هڅه وکړو چي د بې ځایه لګښتونو مخه ونیسو او په غوره مدیریت او شفافیت سره د هیواد عواید لوړ کړو او په اقتصادي وده او سوکالۍ کي ونډه واخلو. نوموړي، له ګډونوالو وغوښتل، چي له شته فرصتونو او اسانتیاوو ګټه پورته کړي او خپل ظرفیت او مسلکي پوهه زیاته کړي، ترڅو کارونه له خنډ او ځنډ پرته ترسره سي.
د یادوني وړ ده، چي دغه انلاین روزنیز پروګرام به (۳) ورځي (د کب میاشتې له ۱۳ څخه تر ۱۵ نیټې پورې) دوام وکړي او ګډونوالو ته به د راپور ورکولو، حواله جاتو، دفتردارۍ او نورو اړوندو مهمو موضوعاتو پروسې تشریح او تدریس سي.
