د مستوفیتونو نويو ګومارل سوو کارکوونکو ته انلاین مدیریتي روزنیز پروګرام ترسره سو
د مالیې وزارت د بشري سرچینو ریاست د یوې ناستي په ترڅ کي، د ولایتي مستوفیتونو د نویو ګومارل سوو کارکوونکو لپاره د دغه وزارت اداري معینیت د غونډو په تالار کي انلاین مدیریتي روزنیز پروګرام ترسره کړ.
په دې ناسته کي د بشري سرچینو رئیس مولوي احمدشاه شاکر، د تدارکاتو رئیس مولوي عتیق الله کریمي او د مالیې وزارت یو شمېر مسئولینو ګډون کړی وو.
د بشري سرچینو رئیس مولوي احمدشاه شاکر د دغه پروګرام په پرانیستې وینا کې وویل، دغه مدیریتي روزنیز پروګرام ستاسي لپاره چمتو سوی دئ؛ تر څو د مدیریت له اصولو او اساساتو سره آشنا سئ او خپلو ګرانو هیوادوالو ته د غوره خدمت جوګه وګرځئ. هغه زیاته کړه، چي له شته امکاناتو څخه په استفادې په خپل ځان او اداره کي مثبت بدلونونه رامنځته کړئ.
د تدارکاتو رئیس مولوي عتیق الله کریمي د بشري سرچینو له ریاست څخه د کارکوونکو د مسلکي ظرفیت د لوړولو په موخه د دغه ډول پروګرامونو د ترسره کولو په پار مننه وکړه او زیاته ئې کړه، چي دغه اسلامي نظام د دې ملت د ډېرو قربانیو په پایله کي واک ته رسېدلی دئ، خلک باید ناهیلي نه کړئ او له هغوی سره په غوره اخلاقو او ورین تندي چلند وکړئ. اداري اصول زده کړئ او له ژبني، قومي او مذهبي تعصب څخه ډډه وکړئ.
ناسته په دعايې سره پاي ته ورسېده او درسونه رسماً پیل سول.
د یادوني وړ ده، چي دغه پروګرام به ( ۵) ورځي دوام وکړي او د مدیریت د اصولو، د ادارې د پراختیا آمریت د اجراآتو پروسیجرونو، له کارکوونکو سره د اړیکو آمریت د کاري پروسیجرونو، د روزني او ظرفیت لوړوني آمریت د پروسو د اجراآتو او سوانحو د ارزوني او نورو مهمو مسائلو په اړه به ګډونوالو ته تدریس پکښي ترسره سي.
