د هرات ولایت ګمرک ته نوی رئیس ور وپېژندل سو
د مالیې وزارت د عوایدو او ګمرکونو د معین او د ګمرکونو د عمومي رئیس له لوري الحاج مولوي محمد حامد "احمد" د هرات ولایت ګمرک د نوي رئیس په توګه د دغه ګمرک کار کوونکو ته ور وپېژندل سو.
په همدې موخه جوړه سوې غونډه کي د دغه ګمرک معاون، د اسلام قلعه او تورغونډۍ بندرونو آمرانو او د دغه ګمرک کارکوونکو هم حضور درلود.
په پیل کي د مالیې وزارت د عوایدو او ګمرکونو معین د اسلامي امارت په اقتصادي کمېسیون او وروسته د هيواد په ګمرکونو کي د مولوي محمد حامد "احمد" د مثبتو کړنو او ګڼو لاسته راوړنو په اړه یادونه او هر اړخیزي خبري وکړې. همدا شان د ګمرکونو عمومي رئيس او د دغه ګمرک پخواني رئيس هم د مولوي محمد حامد "احمد" د وړتیا او خدمتونو يادونه وکړه او په چارو کي ئې ورته د بریالیتوب هيله وکړه.
د یادولو وړ ده، چي محترم مولوي محمد حامد "احمد" تر دې وړاندي د ننګرهار او کندهار د ګمرکونو د رئیس په توګه دندي ترسره کړي دي. نوموړي د هیواد له فتحي وړاندي د جهادي فعالیتونو تر څنګ د اسلامي امارت په اقتصادي کمېسیون کي هم دنده ترسره کړې ده.
هېره دي نه وي، چي د ننګرهار په ګمرک کي د غوره ادارې جوړول، د عوايدو سیسټمي کول، د مسلکي کسانو ګمارنه او همدا راز د کندهار په ګمرک کي د اداري فساد له منځه وړل، هلته ملي سوداګرو ته اسانتياوي رامنځته کول او د عوايدو (۷۰) سلنه لوړېدل د مولوي محمد حامد "احمد" له مهمو لاسته راوړنو څخه یادولای سو
