د ولایتي مستوفیتونو ۴۰ تنو کارکوونکو ته جوړ سوی روزنیز پروګرام پای ته ورسېد
د کب ۳۰مه ۱۴۰۳ هـ.ل
د مالیې وزارت د ګمرکونو او عوایدو ملي اکاډمۍ له تدریسي پلان سره سم، د ولایتی مستوفیتونو (۴۰) تنو کارکوونکو ته « د موټرسیکلونو د ثبت او ګمرکي محصول روزنیز پرګرام » تر سرلیک لاندي (۱۸) ورځنی روزنیز پروګرام د یو لړ مراسمو په ترڅ کي د تصدیق پاڼو په وېشلو سره پای ته ورسېد.
په دغه پروګرام کي د مالیې وزارت د عوایدو لوی ریاست، د قانون پلي کولو رئیس مولوي محمد نعیم منصور، د دې وزارت د دعوت او ارشاد رئیس مولوي عبدالهادی سیف الخالد، د مالیې وزرات د ولایتی عوایدو د انسجام سرپرست رئیس مولوي دوست ثاقب، د مالیې وزارت د کارکوونکو چارو ریاست د استخدام آمر مفتي نیاز محمد منصور، د ګمرکونو او عوایدو ملي اکاډمۍ آمر بلال احمد احدي او د یاد آمریت ښوونکو ګډون کړی وو.
د دعودت او ارشاد رئیس وویل، چي د مؤمن نیت باید سپېځلی وي او خپل مسئولیتونه په پوره صداقت او ایماندارۍ ترسره کړي او الله ج فرمایي: (څوک چي د الله ج د رضا اراده لري؛ نو ښه اعمال دي ترسره کړي) نوموړي د روژې مبارکي په میاشت کي د زیاتو ښو اعمالو په ترسره کولو ټینګار وکړ.
د عوایدو لوی ریاست د قانون پلي کول رئیس ګډونوالو ته وویل، چي د روزنیزو پروګرامونو د مطالبو له ترلاسه کولو وروسته تاسي ته دوه مسئولیتونه متوجه دي؛ یو دنیوي او بل هم اخروي؛ نو خپلي چاري په صداقت او ریښتینولۍ تر سره کړئ، څو د اسلامي نظام د لا پیاوړتیا سبب وګرځئ.
د یادوني وړ ده، چي په دغه روزنیز پروګرام کي د مستوفیتونو کارکوونکو ته د مسلکي ښوونکو له لوري د موټرسیکلونو د ثبت او ګمرکی محصول پروسه، د ګمرکي اظهارلیکونو تشرېح، ګمرکي قوانین، بیي ټاکني او اسیکوډا سیسټم په برخو کي نظري روزنه ورکړل سوه او همدارنګه د عملي کار له پاره د کابل ګمرک ریاست د چارو د لیدني له پاره ور معرفي سول.
