د کورنۍ پلټني لوی رئيس او ورسره مل پلاوي د هيواد ختیځو ولایتونو ته سفر وکړ!
د چنګاښ لومړۍ ۱۴۰۴هـ.ل
د مالیې وزارت د کورنۍ پلټني لوی رئیس ښاغلي الحاج ملا عبدالهادي ابرار په مشرۍ پلاوي د چارو د هر اړخیزي ارزوني په موخه د ننګرهار، لغمان، کونړ او نورستان ولایتونو مستوفیتونو او همدارنګه د ننګرهار او کونړ ولایتونو له ګمرکونو څخه په جلا جلا توګه لیدنه وکړه.
یاد پلاوي د خپل سفر په ترڅ کي د پلټونکو له لوري د پخوانیو پلټنو په لړ کي د ورکړل سویو اصلاحي سپارښتنو د تطبیق څرنګوالی تعقیب کړ، چي له نېکه مرغه یادو ادارو ډېری سپارښتني تطبیق کړي وې، بلخوا د کورنۍ پلټني لوی رئیس د ادارو له مسئولینو وغوښتل، چي د پاتي سپارښتنو تطبیق ته جدي پاملرنه وکړي او د پرمختګ راپور ئې د کورنۍ پلټني له لوی ریاست سره شریک کړي.
د کورنۍ پلټني لوی رئیس او ورسره مل پلاوي د یادو ادارو د هر آمریت او مدیریت د چارو ارزونه وکړه او له مسئولینو سره ئې د پلټني موندني شریکي کړې؛ ترڅو ئې په اړه لازم اجراآت ترسره سي.
د کورنۍ پلټني لوی رئیس د لغمان ولایت له مستوفي سره د لیدني سربېره، د دغه ولایت له والي ښاغلي شیخ شیر احمد حقاني سره په ولایتي کچه د بودیجې د اغېزمني کاروني او په رڼه او شفافه توګه د ملي عوایدو د راټولولو په برخو کي د اړوندو ولایتي ادارو ترمنځ د لا ښې همغږۍ او همکارۍ په اړه هم خبري وکړې.
د کورنۍ پلټني لوی رئیس د یادو ادارو د مسئولینو ستونزي او غوښتني واورېدې او ژمنه ئې وکړه، چي د اصولي حل په موخه به ئې د وزارت له مشرتابه سره شریکي کړي.
