د کورنۍ پلټني لوی رئیس او مل پلاوي د هیواد شمالي ولایتونو ته سفر وکړ!
د وږي ۱۶مه ۱۴۰۴هـ.ل
د مالیې وزارت د کورنۍ پلټني لوی رئيس الحاج ملا عبدالهادي ابرار په مشرۍ د دې ریاست پلاوي، د چارو د کتني او ارزوني په موخه د سمنګان، بغلان، بلخ، کندوز، تخار او بدخشان ولایتونو له مستوفیتونو او همدارنګه د بلخ، کندوز، تخار او بدخشان ولایتونو له ګمرکونو څخه لیدنه وکړه او د یادو ولایتونو له مستوفیانو، د ګمرکونو له مسئولینو او همداراز د دغو ادارو له کارکوونکو سره ئې په جلا ناستو کي ولیدل.
د کورنۍ پلټني لوی رئیس د یادو ادارو له مسئولینو او کارکوونکو سره په لیدنو کي د چارو د روڼتیا او همدارنګه د پلټني د ارزښت په اړه خبري وکړې. نوموړي؛ د دغو ادارو له کارکوونکو څخه وغوښتل، چي ورسپارل سوي چاري په خورا اخلاص او امانتدارۍ سرته ورسوي.
ښاغلي ابرار او مل پلاوي د تېرو پلټنو په لړ کي د پلټونکو له لوري د ورکړل سویو اصلاحي سپارښتنو تطبیق تعقیب هم کړ، چي له نېکه مرغه یادو ادارو ډېری سپارښتني تطبیق کړي وې او د پاتي سپارښتنو د ژر پلي کېدو ژمنه ئې وکړه.
د یادوني وړ ده، چي د ذکر سویو ولایتونو ګمرکونو او مستوفیتونو اړوندي چاري په شفاف ډول له ولایتي ادارو سره په بشپړه همغږۍ رواني وې.
په پای کي د کورنۍ پلټني لوی رئیس د دغو ادارو د مسئولینو او کارکوونکو ستونزي او غوښتني واورېدې، چي د ښې رسېدني په موخه به ئې د وزارت له مقام سره شریکي کړي.
