د ګمرکونو او عوایدو لویو ریاستونو ترمنځ د همغږۍ ناسته وسوه!
د مالیې وزارت د رهبرۍ له هدایت سره سم د ګمرکونو او عوایدو لویو ریاستونو تر منځ د همغږۍ ناسته، د ګمرکونو او عوایدو معین، الحاج مفتي عبدالمتین سعید په مشرۍ او د عوایدو لوی رئیس حافظ مولوي شاه حسین حسیني، د یادو ریاستونو د مرستیالانو او رئیسانو په ګډون د دغه معینیت د غونډو په تالار کي وسوه.
په دې ناسته کي د سوداګریزو شرکتونو د پخوانیو باقیاتو په راټولولو، د عوایدو له تېښتي څخه په مخنیوي او د داسي طرحو په جوړولو خبري وسوې، چي پر بنسټ ئې، د دواړو ریاستونو عواید اغېزمن نه سي. همدارنګه د دواړو ریاستونو له لوري د خامو موادو راوړونکو فابریکو د چارو پر څارني او کنټرول هم بحث وسو او د چارو د لا پرمختګ په موخه اړیني لاري چاري وړاندي سوې.
د ګمرکونو او عوایدو معین د دواړو ریاستونو ترمنځ په اړوندو چارو کي د همغږۍ پر اهمیت ټینګار وکړ. ښاغلي سعید زیاته کړه؛ چي دواړه ریاستونه باید د دې مجلسونو پایلي تعقیب او په خپلو ما تحتو کارکوونکو باندي ئې په عملي ډول پلي کړي.
د یادوني وړ ده، چي یاده ناسته د ګمرکونو او عوایدو لویو ریاستونو تر منځ د ګډو همکاریو د پیاوړتیا په موخه ترسره سوه او په راتلوونکي کي به هم ورته ناستي وسي.
