د ګمرکونو او عوایدو معینیت د اړوندو ریاستونو تر منځ د همغږۍ ناسته وسوه!
د چنګاښ ۲۵مه ۱۴۰۴هـ.ل
د مالیې وزارت د ګمرکونو او عوایدو معين الحاج مفتي عبدالمتين سعيد په مشرۍ د دغه معینیت د اړوندو ریاستونو ترمنځ د (۱۴۰۴هـ.ل) کال د همغږۍ څلورمه ناسته د یاد معینیت د غونډو په تالار کي وسوه.
په دې ناسته کي، چي د اړوندو ریاستونو مسئولینو ګډون کړی وو، په پیل کي د ګمرکونو او عوایدو معین مسئولینو ته د چارو د لا ښه والي په موخه اړیني سپارښتني وکړې.
ورپسې د تېري ناستي د پرېکړو په اړه ټاکل سویو کمېټو د خپلو اجراآتو راپور وړاندي کړ، چي تر هر اړخیز بحث وروسته د رهبري له لوري لازم هدایات ورته وسول.
همدارنګه په دې ناسته کي د پخوانیو مصارفاتي، مالیاتي او ګمرکي باقیاتو د حصول پر څرنګوالي، د صنعتي فابریکو پر واردېدونکو خامو موادو د (۲) سلني انتفاعي مالیې، د سوداګریزو شرکتونو د (۱۱۰) سلني د تضمین پیسې، چي په امانتي بانکي حساب کي پاتي دي او د خپلو جوازونو تصفیې ته نه حاضرېږي او یو شمېر نورو موضوعاتو په اړه بحث او خبرې وسوې او په اړه ئې لازم تصمیمونه ونیول سول.
د یادوني وړ ده، چي د ګمرکونو او عوایدو معینیت د اړوندو ریاستونو ترمنځ د ګډو همکاریو د پیاوړتیا په موخه دا ناستي جوړېږي، چي ورته ناستي به په راتلوونکي کي هم دوام ولري.
