د ګمرکونو لوی رئیس د بلخ ګمرک د چارو د ارزوني په موخه یاد ولایت ته سفر وکړ!
د ګمرکونو لوی رئیس الحاج مفتي عبدالمتین سعید، چي د یوه تخنیکي پلاوي په مشرۍ بلخ ولایت ته په رسمي سفر تللی، د بلخ ګمرک د چارو د ارزوني تر څنګ ئې د دغه ولایت له یو شمېر سوداګرو سره هم لیدلي.
نوموړي، د بلخ ګمرک له کارکوونکو سره په لیدنه کي دوی ته د کارکوونکو تر منځ د لازمي همغږۍ رامنځته کېدو، د اسلامي اصولو سره سم د خپل صورت او سیرت د برابرولو، پر خپل وخت سره د خلکو ستونزو ته د رسېدني او یو شمېر نورو موضوعاتو په اړه لازمي سپارښتني وکړې.
نوموړي د بلخ ولایت له یو شمېر سوداګرو سره په لیدنه کي د ځینو اقلامو د تعرفې، ګمرکي طی مراحلو او په ځینو نورو برخو کي د دوی ستونزي واورېدې، چي د ګمرکونو لوی رئیس له لوري شته امکاناتو ته په کتو سره د ژر حل کېدو ډاډ ورکړل سو.
د یادوني وړ ده، چي د ګمرکونو لوی رئیس وړمه ورځ کندوز ولایت ته هم سفر کړی وو او هلته ئې د ګمرک د چارو د ارزوني تر څنګ د کندوز له والي او یو شمېر سوداګرو سره هم لیدنه کړې وه.
