د ۲۰۲۰ پراختیایي کنفرانس لپاره د افغانستان د مشارکت چوکاټ تخنیکي ناسته
د مالیې وزارت د همغږۍ او راپور ورکولو عمومي رئیس او د پالیسۍ معینیت سرپرست ښاغلي محمد ناصر صدیقي، په مشرۍ د تلې میاشتې په ۲۹ مه نېټه د ۲۰۲۰ پراختیایي کنفرانس لپاره د افغانستان د مشارکت چوکاټ تخنیکي ناسته د مالیې په وزارت کې وشوه.
په دې ناسته کې چې د اړوندو ادارو مسؤلینو او استازو ګډون کړی وو، د ۲۰۲۰ پراختیایي کنفرانس چوکاټ په اړه چې ټاکل شوې ده د روان کال نوامبر میاشتې په وروستیو کې ترسره شي، بحث او د نظرونو تبادله وشوه.
په پیل کې د پالیسۍ معینیت سرپرست، ګډونوالو ته د ښه راغلاست ترڅنګ وویل، چې د جینوا پراختیایي کنفرانس د افغانستان، فنلنډ دولت او ملګرو ملتونو سازمان په ګډ کوربتوب ترسره کېږي او تر ۲۰۲۴ کال پوري د افغانستان لپاره وروستی کنفرانس دی.
ښاغلي صدیقي زیاته کړه، چې د پراختیایي شریکانو او د افغانستان د دولت مشرتابه په هوکړه د دوه اړخیزې حساب ورکړې چوکاټ نوم د مشارکت په چوکاټ بدل شوی، هغه زیاته کړه چې په نوې چوکاټ کې هڅه شوې ده، چې د پخوا په پرتله د ژمنو شمېر را کم او د ژمنو زیاته پاملرنه پراخو اصلاحاتو ته واوړي.
په دې ناسته کې ګډونوالو د خپلو ژمنو په اړه خبرې وکړې او د متن او د تعیین شویو ژمنو د ژبې لپاره یې خپل اصلاحي نظرونه او وړاندیزونه وړاندې کړل.
همدا شان په دې ناسته کې ښاغلي صدیقي د همکاریو نوی چوکاټ چې د جینوا دوه اړخیزه حساب ورکړې د ژمنو چوکاټ پر ځای بدل شوی، ګډونوالو ته معرفي او روښانه کړ.
