له نړیوال بانک سره د اصلاحاتو راوستو او عامه سکټور د معاشونو مدیریت او معیاري کېدو په تړاو ناسته وشوه
د مالیې وزارت مالي مرستیال عبدالحبیب ځدراڼ، په مشرۍ له نړیوال بانک سره د اصلاحاتو راوستو او عامه سکټور د معاشونو مدیریت او معیاري کېدو په تړاو ناسته د ویډیو کنفرانس له لارې وشوه.
د ناستې په پیل کې د دواړو لوریو په موندنو او تحلیل بحث وشو، ورپسې مالي مرستیال د اصلاحاتو او معاشونو معیاري کولو په برخه کي لکه، په دولتي دوایرو کې د معاشونو بیا کتنې په موخه د کاري کمېټې جوړېدو، د هیواد د نافذه قوانینو په پام کې نیولو سره د معاشونو یوشان کېدو او د سپما ګټورو انتخابونو ته د رسېدو په موخه د اصلاحاتو ګړندي کېدو سپارښتنې وکړې او په دې مسئله یې ټینګار وکړ.