له پاکستان څخه د افغان کډوالو د مالونو پر لېږدوونکو وسایطو خاک پولي معاف سوه

د ګمرکونو لوی ریاست په وړاندیز او د مالیې وزارت مقام په منظورۍ، له افغان کډوالو څخه د ملاتړ او دوی ته د اسانتیاوو رامنځته کولو په موخه له پاکستان هیواد څخه د دوی د اموالو پر لېږدوونکو وسایطو خاک پولي معاف سوه.
له دې وړاندي د افغان کډوالو د مالونو بار د افغاني ثبت سوو لاریو موټرونو څخه د افغانستان خاوري ته د داخلېدو پر مهال (۲۵۰۰) افغانۍ، له کوچنیو موټرونو څخه (۱۵۰۰) افغانۍ او له بهرنيو لاريو څخه (۵۰۰۰) افغانۍ او د کوچنیو موټرونو څخه ئې (۳۰۰۰) افغانۍ د خاک پولي په نوم اخیستل کېدې، چي بانکونو ته د یادو پیسو تحویلي د ګڼي ګوني لامل کېده او زیات وخت ته ئې اړتیا لرله، چي له دې سره افغان کډوالو په ځانګړي ډول ښځو او ماشومانو ته ستونزي جوړېدې؛ نو د یادو ستونزو د حل او له افغان کډوالو څخه د ملاتړ په موخه د مالیې وزارت مقام پرېکړه وکړه، چي د یادو وسایطو خاک پولي معاف کړي.
د یادوني وړ ده، چي د پاکستان حکومت د وروستۍ پرېکړي له مخي، چي افغان کډوال دي خپل هیواد ته ستانه سي، هره ورځ د هیواد د ګمرکونو له لاري د افغان کډوالو په اموالو بار لسګونه موټرونه هیواد ته داخلېږي.