له ۱۴ وزارتونو او امارتي ادارو سره د عوایدو د تحلیل او ارزوني په تړاو ناسته وسوه!
د مالیې وزارت د عوایدو لوی ریاست د حمایوي مرستیال مولوي منصور الحق ذاکر په مشرۍ د (۱۴) وزارتونو او امارتي ادارو له استازو سره د غیر مالیاتي عوایدو د تحلیل او ارزوني په تړاو ناسته وسوه.
په دغه ناسته کي د یادو وزارتونو او ادارو د عوایدو د را ټولولو بهیر په هر اړخیز ډول و ارزول سو او د یادو ادارو له پاره د ټاکل سوي عوایدي هدف وضعیت ته کتنه وسوه.
همداراز د ملي عوایدو پر شفاف راټولولو، د غیر مالیاتي عوایدو د سرچینو پر زیاتولو، پر ولس باندي د مالیاتي بوج کمولو او په ټوله کي د مالیاتي پروسي د ښه تطبیق په اړه بحثونه وسول او ټینګار وسو، چي مالیاتي ادارې دي د عوایدو د را ټولولو پر مهال له ولس سره په پوره شفقت او مهربانۍ سره چلند وکړي.
په پای کي د وزارتونو او ادارو له پاره د احتمالي عوایدي کسر د مخنیوي په موخه لازمي سپارښتني وسوې او غوره عوایدي فرصتونه ورته په ګوته سول؛ تر څو ټاکل سوي عوایدي هدف ته په ښه ډول ورسېږي.
