مالیې وزارت او د اسیا پراختیایې بانک د افغانستان لپاره د دې بانک په درې کلن عملیاتي پلان هوکړه وکړه
د مالیې وزارت نوماند وزیر او سرپرست ښاغلي عبدالهادي ارغندیوال نن د زمري میاشتې په ۲۵مه نېټه د افغانستان لپاره د اسیا پراختیایې بانک له رئیس ښاغلي نریندرا سنګرو سره د ویډیو کنفرانس له لارې خبرې وکړې.
په دې لیدنه کې چې د مالیې وزارت مالي معین ښاغلي عبدالحبیب ځدراڼ هم شتون درلود، دواړو لوریو د اسیا پراختیایې بانک په درې کلن عملیاتي پلان، د افغانستان لپاره د دې پلان په ارزښت، په دې پلان کې د طبیعي سرچینو، ترانسپورټ او انرژۍ سکټورونو په برخو کې د لومړیتوب لرونکو ملي پروژو په شاملو او یو شمېر نورو اړوندو مسایلو باندې خبرې وکړې او اړوند هوکړه لیک د مالیې وزارت سرپرست او د افغانستان لپاره د اسیا پراختیایې بانک رئیس له لوري لاسلیک شو.
د مالیې وزارت سرپرست د اسیا پراختیایې بانک له لوري د افغانستان په زیربنایې سکټور کې له پانګونې څخه مننه وکړه او له دوی څخه یې غوښتنه وکړه څو له افغانستان سره خپلو مرستو ته دوام ورکړي.
د یادونې وړ ده چې د اسیا پراختیایې بانک درې کلن عملیاتي پلان د ۲۰۲۱ – ۲۰۲۳ کلونو لپاره دی چې د دې بانک او اسیا زیربنایې وجهي صندوق له لوري تمویلیږي.
