مالیې وزارت د افغانستان او چین ترمنځ د څلورمې دوه اړخیزه اقتصادي او سوداګریزې ناستې ترسره کېدو غوښتونکی شو
د مالیې وزارت سرپرست محمد خالد پاینده، د افغانستان لپاره د چین ولسي جمهوریت له سفیر وانګ یي، سره د مالیې په وزارت کې لیدنه او خبرې وکړې.
په دې لیدنه کې چې د مالیې وزارت د پالیسۍ مرستیال نذیر کبیري او یو شمېر رئیسانو هم ګډون کړی وو، دواړو لوریو د افغانستان او چین ولسي جمهوریت ترمنځ د دوه اړخیزه اقتصادي او سوداګریز کمېسیون څلورمې ناستې ترسره کېدو، له افغانستان سره د چین په مرستو، د یوه کمربند او یوې لارې طرحې ته په پاملرنه منځنۍ او لوېدیځې اسیا ته د وصل ټکي په توګه د افغانستان جیو اکانومیک او ټرانزیټي موقعیت، د افغانستان، چین او پاکستان ترمنځ درې اړخیزه هوکړې، د استوګن ځایونو پروژې په برخه کې د چین هیواد په همکاریو او نورو اړوندو مسایلو په تړاو خبرې وکړې.
د لیدنې په اوږدو کې مالیې وزارت؛ د اقتصادي او سوداګریزې هوکړې پر بنسټ په اقتصادي همکاریو د ټینګار ترڅنګ، وړانديز وکړ چې د افغانستان او چین ترمنځ څلورمه دوه اړخیزه اقتصادي او سوداګریزه ناسته دي د ۲۰۲۱ کال په وروستیو کې ترسره شي. د چین لوري وویل، چې د دې ناستې ترسره کېدو موضوع به له اړوندو چارواکو سره شریکه کړي او له پرېکړې نیونې به د مالیې وزارت خبر کړي.
