مالیې وزارت د افغان کډوالو د داوطلبانه راتګ په موخه د سعودي عربستان سفارت او د پنا غوښتونکو لپاره د ملګرو ملتونو سازمان عالي کمیشنرۍ دفتر سره د همکارۍ هوکړه لیک لاسلیک کړ
د مالیې وزارت نوماند وزیر او سرپرست ښاغلي عبدالهادي ارغندیوال، نن د غبرګولي میاشتې په ۱۰ مه نېټه د افغان کډوالو د داوطلبانه راتګ په موخه د همکارۍ هوکړه لیک په افغانستان کې د سعودي عربستان سفیر ښاغلي جاسم محمد الخالدي او په افغانستان کې د پنا غوښتونکو لپاره د ملګرو ملتونو سازمان عالي کمیشنرۍ دفتر رئیسې اغلې کرولاین وین بیورن سره لاسلیک کړ.
په ټوله کې د دې هوکړه ارزښت ۳۰ میلیونه امریکایې ډالر دی چې په څو پړاوونو کې به پلي شي، نن ورځ د یاد هوکړه لیک لومړی فاز د ۱۰ میلیونه ډالرو په ارزښت لاسلیک شو چې د ۲۰۲۱ کال تر پای پورې به پلي شي. د دې هوکړه لیک لومړی پړاو په ۱۲ ولایتونو کې د ۷ روغتیایې مرکزونو او کلنیکونو جوړول، په ۸ ولایتونو کې د ۱۳ ښوونځیو جوړول او په بېلابیلو ولایتونو کې د ۱۱ کوچنیو او متوسطو زیربنایې پروژو پلي کول دي.
یادې پروژې د پنا غوښتونکو لپاره د ملګرو ملتونو سازمان عالي کمیشنرۍ له لوري پلي کیږي چې د ملي بودیجې څخه بهر د سعودي عربستان پراختیایې صندوق له لوري تمویلیږي.
یادې پروژې د روغتیایې وضعیت ښه کیدو، پوهنې او روزنې او د هغو افغان ګډوالو لپاره چې بیرته وطن ته راستنیږي په زیربنایې چارو کې به مرسته وکړي. نور فازونه یې چې ۲۰ میلیونه ډالر کیږي د لومړي فاز په ختمیدو سره به په راتلوونکو پړاوونو کې پلي شي.
د مالیې نوماند وزیر او سرپرست ښاغلي عبدالهادي ارغندیوال، چې د افغانستان لپاره د سعودي عربستان له سفیر او په افغانستان کې د پناغوښتونکو لپاره د ملګرو ملتونو عالي کمیشنرۍ دفتر له رئیس سره په همدې موخه ناسته درلوده، د افغان کډوالو بېرته راستنېدو او له کرونا ویروس سره د مبارزې په برخه کې د سعودي عربستان شاهي هیواد له مرستو او همکاریو مننه وکړه.
د مالیې وزارت سرپرست وویل، چې د افغانستان حکومت د افغان کډوالو د بېرته راستنېدو غوښتونکی دی او هڅه کوي، چې د هغوی لپاره اړینه زېربنا برابره کړي. همدا شان د مالیې وزارت سرپرست، د پنا غوښتونکو لپاره د ملګرو ملتونو سازمان عالي کمېشنرۍ څخه وغوښتل، چې لګښتونه دې په رڼه توګه او اغېزمن ترسره کړي.
په افغانستان کې د پناغوښتونکو لپاره د ملګرو ملتونو عالي کمیشنرۍ د دفتر رئیس وویل، چې دوی هڅه کوي دغه لګښتونه په رڼه او اغېزمنه توګه ولګوي او د اړوندو چارو او کړنو راپور د افغانستان او سعودي عربستان حکومتونو ته وړاندې کړي.
د افغانستان لپاره د سعودي عربستان سفیر وویل، چې افغانستان زموږ ملګری هیواد دی او موږ خوښ یو چې له دې هیواد سره مرسته کوو. نوموړي زیاته کړه، چې موږ د یوه با ثباته افغانستان غوښتونکي یو او له افغانستان سره زموږ مرستې له څو اړخونو روانې دي او زموږ د نن ورځې مرسته افغانستان ته د افغان کډوالو د با عزته راستنېدو لپاره ده.
