مالیې وزارت د نويو ګومارل سوو کارکوونکو لپاره نږدې ۵۰ روزنیز پروګرامونه جوړ کړي
د مالیې وزارت فعالیتونه د هیواد د یوه کلیدي او مسلکي وزارت په توګه په ملي کچه له خورا ارزښت څخه برخمن دي، له همدې کبله د دغه وزارت اړوند په ټولو ادارو کي د اشخاصو ګومارني؛ وړتیا، رښتینولۍ او مسلکیتوب ته په کتو د ازادو سیالیو له لاري ترسره کېږي او تر څنګ ئې نويو ګومارل سوو کارکوونکو ته، په اړوندو برخو کي د چارو د ښه پرمخ وړلو په موخه ګټور روزنیز پروګرامونه هم جوړ کړي.
د مالیې وزارت د بشري سرچینو ریاست له لوري په (۱۴۰۲هـ.ل) مالي کال کي د دغه وزارت په بېلابېلو بستونو کي نويو ګومارل سوو کارکوونکو ته د مجربو ټرینرانو له خوا (په مالي، تدارکاتي، پرعایداتو د مالیاتو د قانون، د سيګټاس سیسټم، د عوایدو د کړنلارو، تخنیکي، مدیریتي، د رهبرۍ او مسلکیتوب) برخو کي ګټور نظري او عملي روزنیز سیمینارونه جوړ سوي دي.
د یادوني وړ ده، چي د بشري سرچینو ریاست له لوري نويو ګومارل سوو کسانو ته د روزنو دغه لړۍ روانه ده او په راتلونکي کال کي به همدا لړۍ په نويو مېتودونو سره مخته ولاړه سي.
