مالیې وزارت د ښځو د پیوستون نړیواله ورځ ونمانځله
مالیې وزارت نن د کب میاشتې په ۱۸ مه نېټه د یو لړ مراسمو په ترڅ کې د مارچ اتمه د ښځو د پیوستون نړیواله ورځ د دې وزارت په خیبرهال کې ونمانځله.
په دې مراسمو کې چې د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي ډاکټر محمد همایون قیومي، د مالیې وزارت د پالیسۍ مرستیالې اغلی ناهید سرابي، د عوایدو عمومي رئیسې اغلی امنه احمدي، د مالیې وزارت د اداري چارو عمومي رئیس ښاغلي محمد خان دانشجو او د یاد وزارت یو شمېر نورو رئیسانو او کارکوونکو ګډون کړې وو.
د مالیې وزارت سرپرست ښاغلي ډاکټر محمد همایون قیومي د مارچ اتمه د ښځو د پیوستون نړیواله ورځ یې د هیواد او نړۍ ټولو ښځو په ځانګړې ټوګه د مالیې وزارت ښځینه کارکوونکو ته مبارکي وویله او زیاته یې کړه: د مالیې وزارت د رهبرۍ او مدیریت په کچه د ښځو فعاله رول د دې ښودنه کوي چې د دې وزارت رهبرۍ د ښځو د وړتیا لوړو او ودې څخه په جدیت سره ملاتړ کوي.
نوموړي زیاته کړه : د معینیت له کچې نیولې بیا د مالیې وزارت تر ټیټې کچې د ۷۱۵ تنه ښځینه کارکوونکو ګمارنه، د تېرو کلونو په پرته زموږ لپاره د پام وړ او هیله بښونکی رقم دی.
ښاغلي قیومي وویل: له دې ټولو پرمختګونو سره سره د ښځو څخه زموږ ملاتړ بسنده نه کوي او موږ قوي هوډ لرو چې له یوې خوا په مدیریتي او تخنیکي برخو کې اوسنۍ فیصدي لوړه کړو او له بلې خوا د ښځو د پیاوړتیا لپاره د اغیزمنو پروګرامونو په لاره اچولو سره د دوی رول لا پیاوړې کړو.
د مالیې وزارت د پالیسۍ مرسیتالې اغلی ناهید سرابي، د عوایدو عمومي رئیسې اغلی امنه احمدي، د یاد وزارت د اداري چارو عمومي رئیس ښاغلي محمد خان دانشجو، د کابل ولایت مستوفي ټولو ښځو ته د دې ورځې د مبارکۍ ویلو تر څنګ د مالیې وزارت په ټولو برخو کې د ښځو د رول په ارزښت او د ښځو د وړتیا په لوړولو ګډونوالو ته معلومات ورکړل.
همداشان په دې غونډه کې د مالیې وزارت بي وزلو ښځو څخه د ملاتړ په موخه وجهي صندوق په رسمي ډول پرانېستل شو او د غونډې په پای کې هغو ښځینه کارکوونکو ته چې په اړوندو چارو کې له ځانه وړتیا ښودلې وه ستاینلیکونه او د مالیې وزارت نورو ښځینه کارکوونکو ته د دې وزارت لخوا ډالۍ ورکړل شوې.
