مالیې وزارت سرپرست د افغانستان لپاره د اسیایي پرمختیا بانک له رئیس سره د مخې ښې لیدنه وکړه
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د زمري میاشتې په ۱۳ مه نېټه د افغانستان لپاره د اسیایي پرمختیا بانک له رئیس ښاغلي ساموئل تامیوا، سره د مخې ښې لیدنه وکړه.
په دې لیدنه کې، د مالیې وزارت سرپرست له یاد بانک څخه چې خپلې مرستې یې د افغانستان له لومړیتوبونو او د ځان بسیاینې له ستراتېژۍ سره سم همغږي کړي دي، مننه وکړه. نوموړي زیاته کړه، چې له ۲۰۰۱ لومړي کال راپدېخوا د اسیایي پرمختیا بانک هغه زېربنایي پروژې چې د افغانستان اقتصادي ودې لپلره ګټورې دي تمویل کړي دي، او یاد بانک د افغانستان خلکو ته یو باوري بانک دی.
د افغانستان لپاره د اسیایي پرمختیا بانک رئیس ښاغلي ساموئل تامیوا، وویل، چې د دې بانک له ژمنو یو هم د پروژو تمویل دی، څو د افغانستان د خلکو په ژوند کې مثبت بدلون راولي. نوموړي زیاته کړه، چې موږ هڅه کړې ده، څو هغه بنسټیزې پروژې چې د افغانستان اقتصادي ودې ته ګټورې تمامېږي، تمویل او ملاتړ یې وکړو.
په پای کې په یوې ماښامنۍ ناسته کې ، د مالیې وزارت سرپرست د افغانستان لپاره د اسیایې پراختیا بانک له رئیس څخه چې دلته یې کاري موده پای ته رسیدلې له کړنو څخه مننه وکړه.
