مالیې وزارت سرپرست د هیواد د ګمرکونو او مستوفیتونو د کاري بهیر د ارزونو په لړ کي خوست او پکتیا ولایتونو ته سفر وکړ
د مالیې وزارت سرپرست الحاج ملا هدایت الله بدري د یوه پلاوي په مشرۍ د هیواد د ګمرکونو او مستوفیتونو د کاري وضعیت د ارزونې او له نږدې د سوداګرو، مراجعینو او کار کوونکو د ستونزو اورېدلو په موخه دا ځل خوست او پکتیا ولایتونو ته سفر وکړ.
د مالیې وزارت سرپرست د پکتیا له والي سره خبرو کې وویل: د را تګ موخه یې د ګمرکونو، مستوفیتونو او نورو عایداتي سرچینو د چارو ارزونه او له نږدې د کاري بهیر لیدنه، د مراجعینو، مالیه ورکوونکو او سوداګرو د ستونزو او وړاندیزونو اورېدنه، د عوایدو راټولو په برخه کي اړوندو مسؤلینو ته د دقیقي څارني او ارزوني لارښوونه، د مالیه ورکونکو لپاره د منظم سیستم له لاري د ملي عوایدو په غوره راټولو کي د اسانتیاوو رامنځته کول دي.
د مالیې وزارت سرپرست، د ټولو اړوندو برخو او مسؤلینو ستونزي، شکایتونه او وړاندیزونه له نږدې واورېدل او ټولو مسؤلینو ته یې هدایت وکړ، چي د عوایدو راټولو په برخه کي له پوره صداقت، او ایماندارۍ کار واخلي، له مراجعینو سره نېک چلند وکړي، ترڅو داهیواد د خپلو ملي عوایدو له درکه پر ځان بسیا سي او له پردیو هیوادونو مو د مرستي غوښتني لاسونه رالنډ سي.
د یادونې وړده، چي څه باندې یوه اونۍ مخکي د مالیې وزارت سرپرست د تورخم ګمرک څخه له نږدې لیدنه کړې وه او مسؤلینو ته یې ورته سپارښتني کړي وې.
