چین را روانه اوونۍ د کرونا ویروس خپرېدو د مخینوي لپاره وسایل او تجهیزات د افغانستان دولت په واک کې ورکوي
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د وري میاشتې په ۳ مه نېټه د افغانسان لپاره د چین له سفیر ښاغلي وانګ یو، سره په مالیې وزارت کې ولیدل.
د مالیې وزارت سرپرست، د چین له سفیره د کرونا ویروس خپرېدو د مخینوي پرخه کې د مرستو مننه وکړه او ویې ویل، چې د افغانستان لپاره د دې هیواد مرستې اړینې دي او افغانستان په دې برخه کې زیاتو سرچینو ته اړتیا لري.
د چین سفیر وویل، چې ټاکل شوې ده د روان کال اپرېل په لومړیو کې لس زره کرونا ټسټ، د هوا جوړولو دوه دستګاوې او د اکسیجن دوه ماشینونه د افغانستان حکومت په واک کې ورکړي. نوموړي زیاته کړه، چې د علي بابا شرکت ۱۰۰ زره ماسکونه او د کرونا د تشخیص ۲۰ زره ماشینونه له افغانستان سره مرسته وکوي.
د مالیې وزارت سرپرست وویل، چې د کرونا د تشخیص ماشینونه او د خوندیتوب جامې زموږ لومړنۍ اړتیاوې دي. د چین سفیر وویل، خوښ یم چې ستاسو اړتیاوې مې درک کړې او د اړتیا وړ توکې به درته چمتو کړو. هغه زیاته کړه، چې چینایي متخصصینو د افغانستان د عامې روغتیا له وزارت سره د کرونا ویروس د مخنیوي په پار خپلې تجربې د ویډیو کنفرانس له لارې شریکې کړې دي.
همدا شان دواړو لوریو د ګمرکي معلوماتو د راکړې ورکړې په تړاو خپل نظرونه تبادله کړل. ښاغلي قیومي، وویل؛ چې افغانستان غواړي د مالیاتو له تېښتې او د واقعیت خلاف اظهارلیکونو د مخنیوي لپاره د چین له هیواد سره چې د افغانستان مهم همکار دی ګمرکي اطلاعات او معلومات تبادله کړي. دغه چاره به د دواړو هیوادونو له صادراتو او وارداتو سره مرسته وکړي.
د چین سفیر د مالیې وزارت سرپرست له وړاندیز وړاندیز څخه د هرکلي ترڅنګ وویل، چې دا موضوع به د خپل د هیواد له چارواکو سره شریکه کړي.
