د مالیې وزارت سرپرست د سویډن نړیوالو پراختیایي همکاریو وزارت له مرستیال سره د افغانستان لپاره د سویډن نوې پراختیایي سټراتېژۍ په اړه بحث وکړ
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د تلې میاشتې په ۲۸ مه نېټه د نړیوال بانک او پیسو نړیوال صندوق مدیره پلاوي کلنۍ ناستې په څنډو کې د سویډن نړیوالو پراختیایي همکاریو وزارت له مرستیال ښاغلي پرآلسن فرایډ، سره د ګډو همکاریو، د ولسمشرۍ ټاکنو بریالي ترسره کېدو او سولې پروسې په تړاو بحث وکړ.
د سویډن نړیوالو پراختیایي همکاریو وزارت مرستیال، وویل، چې سویډن هیواد د افغانستان لپاره په نوې پراختیایي سټراتېژۍ کار کوي. نوموړي د مالیې وزارت له سرپرست څخه غوښتنه وکړه، چې د دې سټراتېژۍ داغېزمنتوب لپاره دي د اړوند برخو لړلیک شریک کړي.
د مالیې وزارت سرپرست د افغانستان لپاره د سویډن له پراختیایي همکاریو مننه وکړه او ویې ویل، چې د سویډن په پراختیایي سټراتېژۍ کې دي د نورو برخو ترڅنګ حرفوي او تخنیکې تحصیلات او د استوګنیز چاپېریال موضوعات هم شامل شي.
